ᐅᑭᐅᖅᑕᖅᑐᖅ
ᓯᕗᓪᓕᖅᐹᒥᒃ ᑕᑯᔭᕆᐅᖅᓱᒍ ᑕᒪᓐᓇ ᐃᑮᕐᓇᕐᓂᑐᐃᓐᓈᓗᔮᕆᔭᐅᕙᒃᑐᖅ ᐊᒻᒪᓗ ᓱᓇᑕᖃᖏᓐᓇᓱᖏᔭᐅᕙᒃᑐᖅ, ᓱᓇᐅᕝᕙᓕ ᐊᓐᓂᕐᓇᖅᑐᐊᓘᑎᓪᓗᒍ ᐊᒻᒪᓗ ᐱᐅᔪᐊᓘᓪᓗᓂ, ᐊᖏᕐᕋᕆᔭᐅᔪᖅ ᐃᓄᖁᑎᖏᓐᓄᑦ ᐊᒻᒪᓗ ᐆᒪᔪᖁᑎᖏᓐᓄᑦ.
ᐅᑭᐅᖅᑕᖅᑑᓂᖓᑦ ᐊᒻᒪᓗ ᐅᑭᐅᖅᑕᖅᑑᓂᕋᖅᑕᐅᕙᑦᑑᑉ ᐊᑕᓃᓐᓂᖏᑦ ᐊᖏᕐᕋᕆᔭᐅᕗᑦ ᖃᓂᒋᔭᖏᓐᓄᑦ 30-ᓄᑦ ᐊᔾᔨᒌᖏᑦᑑᑎᐅᔪᓄᑦ ᐃᓄᖕᓄᑦ ᐃᖕᒥᒍᑦ ᐃᓕᖅᑯᓯᖃᖅᑐᓄᑦ ᐊᒻᒪᓗ ᐱᐅᓯᖃᖅᑐᓄᑦ. ᓄᓇᖃᖄᖅᑐᑐᖃᐃᑦ ᐃᓄᐃᑦ ᐅᑭᐅᖅᑕᖅᑐᒥᐅᑕᐃᑦ, ᐊᒥᓲᓗᑎᒃ ᐃᖕᒥᓂᒃ ᑕᐃᒍᐃᕙᒃᑐᑦ ᐅᖃᐅᓯᕐᒥᒃ ᐊᑐᖅᓱᑎᒃ ᐃᓄᐃᑦ, ᓄᓇᖃᖅᐳᑦ ᐅᐊᖕᓇᖅᐸᓯᐊᓃᓐᓂᖅᐹᖓᓂᒃ ᐊᕕᒃᑐᖅᓯᒪᓂᖏᓐᓂ ᑲᓇᑕᐅᓪᓗ ᐊᒥᐊᓕᑲᐅᓪᓗ ᓄᓈᓗᐊᓂᒃ ᐊᑕᔪᒥᒃ, ᐄᓯᐊᒥᐅᑕᓂ ᐊᒻᒪᓗ ᐊᑯᑭᑦᑐᕐᒥᐅᑕᓂ. ᐅᓪᓗᒥᐅᓕᖅᑐᖅ ᐊᑐᖅᑕᐅᕙᓕᖅᑐᑦ ᐊᓯᔾᔨᖅᓯᒪᒐᓗᐊᖅᓱᑎᒃ ᖃᐅᑕᒫ ᐃᓅᓯᕆᔭᖏᓐᓂᒃ ᐅᑭᐅᖅᑕᖅᑐᒥ, ᐃᓄᐃᑦ ᐊᕕᒃᑐᖅᓯᒪᓂᖏᓐᓂ ᓱᓕ ᐊᑕᔪᒻᒪᕆᐊᓘᕗᑦ ᑐᖓᕕᖃᖅᓱᑎᒡᓗ ᐃᓅᔾᔪᑎᒃᓴᒥᓄᑦ ᐊᕙᑎᑐᖃᕐᒥᓂᒃ ᐊᒻᒪᓗ ᐅᑭᐅᖅᑕᖅᑐᒥ ᓂᕐᔪᑎᓂᒃ.
ᐊᐃᕖᑦ, ᕿᓇᓗᒐᐃᑦ ᐊᒻᒪᓗ ᓇᓄᐃᑦ ᐃᓕᑕᕆᔭᐅᒪᓂᖅᐹᖑᕙᓪᓚᐃᔪᑦ ᐆᒪᔪᖏᓐᓂᒃ ᓂᕐᔪᑎᓂᒃ ᐅᑭᐅᖅᑕᖅᑐᒥ, ᓴᕿᐅᒪᔾᔪᑕᐅᒐᒥᒃ ᖃᓄᖅ ᐱᐅᑎᒋᖕᒪᖔᑕ, ᐊᔾᔨᐅᖏᑎᒋᖕᒪᖔᑕ ᐊᒻᒪᓗ ᐊᒥᓲᓂᖏᓐᓂᒃ ᐅᑭᐅᖅᑕᖅᑐᒥ ᓂᕐᔪᑎᖃᕐᓂᖏᑦ. ᐃᓅᓯᖅ ᐅᑭᐅᖅᑕᖅᑐᒥ ᐱᔭᕆᐊᑐᔫᒐᒥ ᐊᒻᒪᓗ ᐊᒃᑐᖅᑕᐅᓴᕋᐃᑦᑑᓪᓗᓂ ᓄᓇᖓᑦ, ᐱᕈᖅᕕᐅᔪᓐᓇᕐᓂᖓ, ᐆᒪᔪᖃᕐᕕᐅᔪᓐᓇᕐᓂᖓᓪᓗ. ᑲᓇᑕᐅᑉ ᐅᑭᐅᖅᑕᖅᑐᖅᐸᓯᐅᓂᖓ ᐊᖏᓂᖃᕐᒪᑦ 1,425,000-ᓂᒃ ᑭᑉᐹᕆᒃᑐᓂᒃ ᑭᓛᒥᑕᓂᒃ, ᐊᖏᕐᕋᕆᔭᐅᓗᓂᓗ ᐊᒥᓱᒻᒪᕆᖕᓄᑦ ᐃᓄᖕᓄᑦ, ᓄᓇᖃᖄᖅᑐᑐᖃᐅᔪᓄᑦ, ᐊᓪᓚᓄᑦ, ᐊᓪᓚᖓᔪᓄᑦ ᐊᒻᒪᓗ ᓄᓇᖃᖄᖅᑐᑐᖃᐅᖏᑦᑑᒐᓗᐊᓄᑦ ᓄᓇᓕᖏᓐᓂᒃ. ᐊᑯᑭᑦᑐᕐᒥᐅᑦ ᑭᖑᓂᐊᓂ, ᑲᓇᑕᒥᐅᑦ ᐅᑭᐅᖅᑕᖅᑐᒥ ᕿᑭᖅᑕᒐᓴᖏᑦ ᓄᓇᕐᔪᐊᓕᒫᒥ ᖁᕝᕙᓯᖕᓂᖅᐹᒦᑐᓂᒃ ᓄᓇᖁᑎᒋᔭᐅᕗᑦ.
ᑭᓯᐊᓂᓕ ᐅᑭᐅᖅᑕᖅᑐᖅ ᐊᖏᕐᕋᕆᔭᐅᔪᑑᖏᒻᒪᑦ ᐃᓄᖕᓄᑦ ᓂᕐᔪᑎᖁᑎᖏᓐᓄᓪᓗ. ᐊᒥᓱᓄᑦ ᐊᒃᑐᐃᓂᖃᖅᐸᒃᑐᑦ ᐅᖓᓯᒃᑐᐊᓗᖕᒦᑦᑑᒐᓗᐊᓂᒃ. ᐊᐅᓚᑦᑕᐅᓂᖏᓐᓄᑦ ᓯᓚᐅᑉ ᖃᓄᐃᓐᓂᕆᔭᖓᑦ ᐊᒻᒪᓗ ᐊᖏᔪᒥᒃ ᓯᕿᓂᕐᕕᐅᕙᖕᓂᖏᓐᓄᑦ ᐅᑎᒧᑦ ᐊᓂᕐᓂᖃᖏᓐᓂᕐᒧᑦ, ᐅᑭᐅᖅᑕᖅᑑᓂᖅ ᓄᓇᕐᔪᐊᕐᒥ ᐃᓂᖃᖅᐳᖅ ᓲᕐᓗ ᖁᐊᖅᓰᕝᕕᒃᑎᑐᑦ ᐅᑭᐅᖅᑕᖅᑐᖅᐸᓯᐅᔪᑎᑐᑦ, ᐊᖏᔪᒥᒡᓗ ᐃᒃᐱᒋᔭᐅᓕᖃᑦᑕᖅᓱᑎᒃ ᓯᓚᐅᑉ ᖃᓄᐃᓕᖓᓚᖓᓂᖏᓐᓄᑦ ᓇᓂᑐᐃᓐᓇᖅ ᓄᓇᕐᔪᐊᕐᒥ.
ᐆᓇᖅᓯᕙᓪᓕᐊᑎᑕᐅᒍᓂ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᓱᒃᑲᓕᔪᒥᒃ ᐊᓯᔾᔨᖅᓯᓂᐊᖅᑐᖅ ᐅᑭᐅᖅᑕᖅᑐᖅᐸᓯᐅᓂᕐᒥᒃ, ᓴᕿᑎᓗᑕᐅᓗᓂᓗ ᓄᑖᓂᒃ ᐅᓗᕆᐊᓇᕈᑕᐅᔪᓐᓇᖅᓯᓂᐊᖅᑐᓂᒃ ᐊᑦᑕᕐᓇᖅᓯᔾᔪᑕᐅᓂᐊᖅᑐᓂᒃ ᐊᒻᒪᓗ ᐊᖏᔫᑎᓂᒃ ᐊᒃᓱᕈᕈᑕᐅᓕᕈᓐᓇᖅᑐᓂᒃ ᐊᕙᑎᖏᓐᓄᑦ ᐊᒻᒪᓗ ᓂᕐᔪᑎᖁᑎᖏᓐᓄᑦ, ᐃᓄᖁᑎᖏᓄᓪᓗ ᐅᑭᐅᖅᑕᖅᑑᓂᕐᒥ ᓇᓂᑐᐃᓐᓇᕐᓗ ᓄᓇᕐᔪᐊᕐᒥ.
ᒍᓖᓐᐲᓯᒃᑯᑦ ᓄᓇᒥᒃ ᐊᕙᑎᒥᒡᓗ ᓇᓂᑐᐃᓐᓇᖅ ᓇᐅᑦᑎᖅᑐᐃᔩᑦ ᐊᐅᓚᔾᔭᐃᒋᐊᖅᑎᑦᑎᓯᒪᓕᖅᑐᑦ ᐅᖓᑕᓃᑦᑐᓂᒃ 5 ᒥᓕᔭᓐᓂᒃ ᐃᓄᖕᓂᒃ ᒪᑭᒋᐊᖁᓪᓗᒋᑦ ᐃᑲᔪᖁᓪᓗᒋᑦ ᓴᐳᓐᓂᐊᖅᑕᐅᓯᒪᔭᕆᐊᖃᓂᖓᓄᑦ ᑕᒪᓐᓇ ᓂᒡᓚᓱᐃᓐᓇᖅᐸᒃᑐᖅ ᓄᓇᖁᑎᖓᑦ ᓴᐳᓐᓂᐊᖅᑕᐅᓯᒪᔭᕆᐊᖃᓗᐊᕐᒪᑦ. ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ, ᑕᑯᓂᐊᕈᓐᓇᖅᐸᐃᑦ ᑕᑯᓂᐊᖅᑕᐅᕕᒃᐳᑦ ᐅᕙᓂ: SavetheArctic.org