牠神秘，牠怕醜，宋亦希眼中的兩棲爬行動物，各有各性格。
「喺香港問市民關於蛇、蛙、龜，佢哋第一感覺都係好憎、想食；好驚、有毒……」先入為主的標籤、不算討好的樣子，兩棲爬行動物輸在起跑線，何以情有獨鍾？現為香港大學生物科學學院研究助理教授的宋亦希記得，當年獲中學老師鼓勵於生物實驗室養動物，到金魚街卻「嫌養魚悶」，便投向青蛙仔懷抱；繼而是大學海南島交流團初嘗夜間考察，在森林與蛇同行、辨識十多種青蛙，那一晚令他「開咗竅」，「呢啲動物好神秘，當我哋喺屋企睇電視、打機，佢哋喺出面做緊好多唔同嘅嘢，好想了解」。
因壁虎之名，為郊野邊陲發聲
香港半葉趾虎，從此不再是「某種」半葉趾虎咁簡單。 受訪者提供圖片/李詠豪攝
一路了解到成為事業，宋亦希最為人熟知的保育成果，當數去年為「香港半葉趾虎」正名。90年代初已有兩棲爬蟲學家在香港發現半葉趾虎，卻僅歸類為東南亞品種；2017年，他與團隊到香港島、石鼓洲、蒲台島等有記錄地方採集標本，經過DNA分析及歸納外型特徵，「就咁睇身體比例唔同，例如頭會圓啲、嘴同手會短啲、身會長啲……當然要睇多少少先對壁虎有啲感覺，但睇得多都會分得到」，確認牠為香港獨有新種。
適逢當時政府在土地大辯論提出「郊野邊陲」的土地供應選項（包括中長期選項兩個試點及概念性選項），意圖染指珍貴綠野，亦意味這香港特有壁虎隨時面臨發展威脅。因此以「香港半葉趾虎」命名，既是國際慣例，也是用心良苦：「我哋想講一個概念：唔係郊野公園邊陲就冇生態價值，希望用呢個香港獨有品種，話畀大眾知邊陲地方都可以有高生態價值。」
明日大嶼認「蜥」‧不認識？
要揭開鮑氏雙足蜥的神秘面紗，有待進一步研究。 受訪者提供圖片/李詠豪攝
相比以往經常摸黑探險、不時周身損傷回家，宋亦希笑言近年因專注研究而多做「鍵盤戰士」，但訪問當日甫走進龍虎山郊野公園，到處探頭查看泥土、水渠、石牆罅隙猶如地毯式搜索，他自稱昔日那個「喺乾嘅地方搵濕地、濕嘅地方搵乾地……搵嘢嚟做嘅𡃁仔」，瞬間歸位。
捐窿捐罅捉迷藏，也是他與香港特有蜥蜴品種鮑氏雙足蜥的約定。世界這樣大，但這種貌似蚯蚓的爬行動物，偏偏只在香港三島：石鼓洲、喜靈洲、周公島被發現，「你睇成個地圖，點解淨係呢三個島有？點解長洲冇、大嶼山冇、坪洲冇？好值得去問」。更添神秘是其穴居特性，隨時匿藏一、兩呎深，令數十年來有限的調查研究，只曾發現十多條個體。
不過，周公島與喜靈洲雙雙毗鄰政府「明日大嶼」填海選址，一旦工程上馬，鮑氏雙足蜥的生存空間勢受衝擊。宋亦希期望展開更多研究工作，避免牠不到氣絕便已安葬，「當你講發展明日大嶼，而我哋好多資料都唔知道嘅時候，應該要盡量避免如果進行會對佢哋（鮑氏雙足蜥）有影響」。
「明日大嶼（施工地點）嘅生態價值係咪較低……所有嘢都係相對，究竟同邊個地方比較，有時我哋討論時，呢個都未必咁清楚。就咁話呢度喺香港嚟講相對較低，其實比較空泛。」
保育會戰勝「龜」來
宋亦希以恢復香港淡水龜種群為志業，「暫時係失敗，但我希望過多20年會成功」。受訪者提供圖片/游崇偉攝
走進宋亦希的辦公室，書櫃有金錢龜模型，相框主角是野生大頭龜，還有肩負校園教育使命的活龜……龜全部都係龜，正正反映了心之所繫：香港淡水龜保育。過去二、三十年，從供應食物市場到滿足飼養需求，淡水龜在整個亞洲慘遭嚴重非法捕獵，連同大眾認知不多、執法存在漏洞等因素，據他估計，香港龜的數目或比廿年前銳減95%以上。「當你問番老人家，以前住村屋都有好多原生龜、金錢龜……我覺得係最慘烈嘅一個族群。」
「我一路做，我啲龜愈來愈少。」悲觀、氣餒、失望，在香港保育人士心中也許老是常出現。像他眼見當城市以經濟先行，很多例子都是先發展後保育，或者縱然市民擁有一定保育意識，促使政府主動或被動落實個別補救措施，「到真係咁多人關注，仲有冇太多地方、品種嚟得切保護？」但支撐他繼續從事學術研究，藉科研實證影響立法，以至協助環保團體推展保育運動，是一種「我比前賢路已寬」的覺悟，「當我同師兄交流，佢會話比以前已經好好多，只要保持信念，點都會繼續進步……近兩、三年覺得做嘅嘢開始對社會有少少影響，或者你見到自己嘅學生真係做到啲嘢，都好特別。」
「我都冇乜彎轉，呢一世都係咁樣走落去，如果有路俾我走落去，希望好順暢咁做落去。」
小樹蛙之野望：香港可以畀全球借鑑
不過幾分鐘路程，宋亦希從辦公室來到龍虎山，尋找兩棲爬行動物蹤影。
中學時期的宋亦希，曾經有個生物紀錄片主持夢。如今把兩棲爬行動物帶到幼稚園，給小朋友上一課環境教育，the show still goes on：「我希望佢哋唔好驚，最直接可能係以後行山唔會打死條蛇、唔會傷害佢哋，甚至支持保育……就算講昆蟲、飛蛾，喺大自然都有佢哋嘅角色。當我哋傷害佢，對人類生活、生存可能有影響。」
他記得早年在中國大陸從事保育工作，面對最大威脅並非地產發展而是村民狩獵，由此倍添熱誠爭取人與自然和諧永續；他回看盧氏小樹蛙的成功例子，有賴各方支持、配合之餘，更重要是詳細研究與充份了解。一邊以同理心溝通，一邊尋求科研真相，有一種幸福叫做自己喜歡的事，「你唔會喺太多地方可以做生態研究、野外考察，半個鐘後就落番城市飲晒汽水、食晒飯，但見到嘅生物多樣性、種類、稀有程度，唔會比好多地方差。」
訪問完成後，牠才從林間躍然現身。
「唔少品種喺香港仲有出現，保育價值係全球性：例如穿山甲，中國大陸廿年前差唔多已經捉晒。香港人口咁密集，如果保育都做得到，其實喺全世界可以做好好嘅例子，咩叫可持續發展，經濟發展、生態保育點樣一齊做好。香港絕對係一個生物天堂，一個值得做好生態保育嘅地方。」
