Suliniuteqarnerit nakuusernertaqanngitsumillu akerliuniarneq

Qupperneq - juli 9, 2015
Greenpeacep pinngortitamik avatangiisinillu illersuiniarluni suliniuteqarnera nunat tamalaat isumaqatigiissutaannik iliuusissatullu isumaqatigiissutaannik aallaaveqarpoq. Tamakku unioqqutinneqaraangata nunarsuarmioqatigiit iliuuseqartinniarlugit nipituuliutiginissaat pisariaqarsinnaasarpoq.


Greenpeace annertuunik anguniagaqarpoq; pinngortitap illersorneqarnissaata tusaaniarneqarnissaa inuillu imminnut illersornissaminnut killilimmik periarfissaqartut tusaatissaqartinnissaat anguniagaavoq.

Avatangiisitigut ajornartorsiutit paasiniarnissaannik ajornartorsiutaasunullu peqqutaasut annertussaannillu uppernarsaanissaq Greenpeacep ilungersuutigalugu sulissutigaa. Uppernarsaanissarli tamatigut naammaqqajarneq-ajorpoq, taamaattoqartillugulu Greenpeace iliuuseqarnissani tunuarsimaarfigineq-ajorpaa. Nunarsuarmi siuttuusut nunarsuarmioqatigiillu pinngortitami avatangiisinilu ajornartorsiutit ilungersunartut pillugit paasitinniarnissaannut Greenpeacep nakuusernerta qanngitsumik akerliuniarneq atortarpaa. 

Iliuuseqarnissamut pisussaaffeqarneq

Inuttut pisinnaatitaaffiit avatangiisillu illersornissaat pillugit ajugaanerit oqaluttuarisaanermi malunnaatillit akerliuniarnerit iliuutsillu inatsisit maleruaqqusallu atuuttut unioqqutinnerisigut anguneqartarsimapput. Amerikami taartumik amillit innuttaasutut pisinnaatitaaffimminnik ilungersuuteqarnerinit Mahatma Gandhip Indiap namminiilivinnissaanik ilungersuuteqarneranut - oqaluttuarisaanerup takutippaa nakuuserneqartanngitsumik akerliuniarneq naapertuilluarnissamut allannguinissamullu sakkussaasoq pitsassuaq.

Pinngortitaq imminut illersoriarsinnaanngitsoq imaluunniit innuttaaqatigiit amerlanngitsut aningaasarsiornikkut naalakkersuinikkulluunniit soqutigisanit illuatungilerneqaraangata pissaanerup agguataarneqarnera imaluunniit inatsisiliorneq naammaginarunnaaraangata iliuuseqarnissaq inuttut pisussaaffinngortarpoq. Greenpeace isumaqarpoq naleqartitat aalajangersimasut inniminartuusut taakkulu illersornissaat pisortatigoortumik 'naalasseriarnermit' pingaaruteqarnerusut. Ataatsimut isigalugu nunarsuup minguitsup uumassusillillu pigiuaannarnissaanut kikkut tamarmik maanna siunissamilu pisussaaffeqarput.

Greenpeace issittumi ilaatigut uuliasiorluni qillerivinnut Shellimit, Statoilimit Cairn Energymillu pigineqartunut suliniuteqarsimavoq, taakku issittumi avatangiisinut mianernartunut annertuumik aarlerinartorsiortitsisinnaammata.

Nakuusernertaqanngitsumik akerliuiniarnermi malittarisassat

Greenpeacep suliniuteqarnerini nakuusernertaqanngitsumillu akerliuniarnerini malittarisassat ataani allassimasut tamatigut malinneqartussaapput:

  • Suliniuteqartut nakuuserneq atunngisaannassavaat
  • Suliniuteqartut aserorterinngisaannarput
  • Suliniuteqartut suliniuteqarnerminni sumiinnertik aammalu iliuutsitik pillugit paasissutissanik eqqortunik tamatigut tunniussiuaannarput.