Greenpeace – nunarsuaq tamakkerlugu suliniaqatigiiffik

Qupperneq - juli 9, 2015
Pinngortitaq assigiinngisitaarfiusoq avatangiisillu peqqissut inuunitsinnut toqqammaviupput. Tamatta pinngortitaq pinngitsoorsinnaanngilarput, asuliinnaanngitsumik, inuuniarnissarpulli atugarissaarnissarpullu pillugit. Greenpeace nunarsuaq tamakkerlugu nunani 40-ni immikkoortortaqarfeqarpoq; najukkami, nunarsuup immikkoortuani nunarsuullu sinnerani pinngortitap avatangiisillu illersornissaannut eriaginissaannullu ataqatigiissaarineq sulinerlu taakkunani ingerlanneqartarpoq.



Greenpeace pinngortitamik avatangiisinillu illersuiniarnermik nunarsuarmut tamarmut tunngasunik suliaqartuuvoq. Suliniuteqarfigineqartut pingaarnerit tassaapput: Issittumik illersuiniarneq, Amerikap kujalliup orpippassui siallersartut, aalisarnerup piujuaannartitsinissaq tunngavigalugu ingerlanneqarnissaa, ilaatigut annoraaminiliorluni suliffissuaqarnermi akuutissanik navianartunik atuiunnaariartortitsinissaq, atomip nukinganik atuinerup unitsinneqarnissaa, GMO tunngavigalugu nunalerineq kiisalu minnerunngitsumillu nunarsuarmi silap pissusiata allanngoriartornerata pitsaaliornissaanut annikillisarnissaanullu annertuumik suliniuteqarneq.

Nalitsinni avatangiisitigut ajornartorsiutit ilarpassui nunarsuarmi tamarmi atuuttuupput, taamaammat Greenpeace nunarsuarmi sumiiffippassuit ataatsikkut najuuffigisariaqartarpai.

Greenpeacep qullersaqarfia Amsterdamimiippoq. Greenpeace Internationalip nunarsuaq tamakkerlugu suliniuteqarneq tassanngaanniit ataqatigiissartarpaa nunanilu nunarsuullu immikkoortuini allaffiit ilaatigut namminersortut 40-t missaaniittut suleqatigalugit. Greenpeacep Danmarkimi allaffeqarfia Greenpeace Nordenip ataaniippoq, tassalu nunarsuup immikkoortuani allaffeqarfiulluni.

Greenpeace nunarsuaq tamakkerlugu tapersuisutut 3 millionit missaannik ilaasortaqarpoq; taakku inuinnaapput suliniaqatigiiffiullu sulineranut katillugit 1 milliardit koruuninik ukiumut tunissuteqartarlutik. Greenpeace nunat naalakkersuisuinit suliffeqarfinniillu tunissutinik tigusaqarneq-ajorpoq.

Greenpeace Internationalip generalsekretæria tassaavoq Sydafrikamiu Kumi Naidoo.

Greenpeacep oqaluttuassartaa tamakkerlugu uani atuarsinnaavat