Greenpeace.gl-imut tikilluarit

Nutaarsiassat - septembari 23, 2015
Greenpeace.gl-imut tikilluaritsi! Ullumikkumiit Greenpeace-p suliai pingaarnerit pillugit nutaarsiassat kalaallisut atuarneqarsinnaalerput.

Ukiut makku innuttaasut kalaallit uuliasiornerit, aatsitassarsiornerit aalisarneq allarpassuillu pingaarutilliit pillugit isummerfigisarpaat. Isummerfigisassat ilagaat qanoq ililluni avatangiisimik innarliinngitsumik Kalaallit Nunaat ineriartortinneqarsinnaanersoq.

Greenpeace tamanna pillugu oqallinnermut siuarsaaqataarusuppoq¬ – taamaattumillu nittartakkamik silap pissusaanut avatangiisimullu tunngasunik nutaarsiassanik imalik kalaallisut danskisullu atuarneqarsinnaasoq saqqummiuppaat.

”Ukiorpaaluit ingerlanerini Kalaallit Nunaata avatangiisiinut tunngasunik suliaqartareerluta nuannaarutigaarput nutaarsiassat paasissutissallu kalaallisut allaqqasut – annerusumik kalaallinut tunngassutillit, aammali nunanut issittumut nunarsuullu sinneranut tunngasut saqqummiussinaanngoratsigit”, Jon Burgwald, Greenpeace-p nunani issittunut tunngasunik oqaaseqartartuat oqarpoq.

Greenpeace Kalaallit Nunaata avatangiisianut tunngassutilinnik pimoorussillutik suliniuteqartartuupput, kingullertigullu umiarsuaq Arctic Sunrise Tunup Avannaata imartaani, qilalukkat qernertat illersorneqarfiisa killeqarfiisa nalaani sajuppillatsitsilluni misissuinerit uppernarsarniarlugit angalasimavoq. Sajuppillatsitsilluni misissuinerit Kalaallit Nunaata imartaani uuliasiornnissamut iliuuseqarnerni siulliuvoq, tamannalu Kalaallit Nunaata unammilligassaasa ilagaat.

”Kalaallit Nunaat politikkikkut ajugaaniunnerniit ingerlatsiviillu naalagaaffinnit amerlasuuneersut tiguaaniarneriniit suliffissaqarniarnerup ilinniarnermillu pisariaqartitsinerup aporaaffiisa nalaanniipput. Kalaallit Nunaata siunissaa pillugu kalaallit oqallinnissamut peqataanissaat pingaaruteqarpoq, neriuppugullu nittartakkakkut greenpeace.gl-kkut nutaarsiassanik avatangiisinut tunngasunik allaaserisaqartarnerput oqallinnissamut tapertaasinnaassasoq”.

Neriuutigaarput kissaatigalugulu www.greenpeace.gl tigulluarneqarumaartoq, nittartakkamilu tassani misissuillusilu nunani issittuni nunarsuullu sinnerani avatangiisip silallu pissusaata illersornissaanut suliatsinnut tunngasunik nutaarsiassanik malinnaasarumaartusi.

Nersualaarutissaqarussi isornartorsiuutissaqarussiluunniit saaffiginninnissarsi tikilluaqquarput. Ajoraluartumilli kalaallisut saaffiginnissutit akinissaannut periarfissaqanngilagut.