Nalunaarusiap nutaap sajuppillatsitsilluni misissuineq arfernut aarlerinartoqartippaa

Nutaarsiassat - aggusti 24, 2015
Ilisimatuut nalunaarusiami nutaami Tunup avannaata imartaani sajuppillatsitsilluni misissuinerit aallartereersut aarlerinartoqartippaat mianersoqqissaarnissamillu kajumissaaralutik. Greenpeacekkut sumiffimmut tassunga umiarsuarmik Arctic Sunrise-mik ingerlaarput.

Ullumikkut Greenpeacep sajuppillatstsilluni misissuinerup, Marine Conservation Research-imit ingerlanneqartup, issittup avannaata arferinut kingunerisinnaasai pillugit nalunaarusiaq saqqummersippaat. Nalunaarusiap ersersippaa sajuppillatsitsilluni misissuinerup, tassaasup uuliasiulinnginnermi ingerlanneqaqqaartartup, arferit tusaasaat, piniartarnerat piaqqiortarnerallu kalluarsinnaagaat. Tamannalu arferit ikilisinnaanerinut pisooqataasinnaavoq.

“Qularnanngilaq sajuppillatsisinikkut nipiliortitsineq arfernut malunniutaasoq. Arferit tusaasaat attaveqarnerallu ajoqusersinnaavaat, uumaffiinit peersillugit aammalu aqqarnermi nerisassarsiornermilu pissusaat ingerlaarfiillu sunniuteqarfigalugu. Arfernut ajoqusiisinnaanerinut takussutissat amerliartuinnarput ilaatigullu aamma piaqqiorsinnaanerat akornuserlugu, sikup ataanut anersaarfissaqanngitsumut pisinnaanerinut sissamulluunniit tipisinnaanerinik kinguneqartitsisinnaalluni” Dr. Oliver Boisseau, Marine Conservation Research-imi ilisimatooq taamatut oqarpoq.

28. aggusti 2015

MY Arctic Sunrise in Greenland © Nick Cobbing/ Greenpeace

 

Arctic Sunrise ingerlaarpoq
Greenpeacekkut maanna umiarsumik Arctic Sunrisemik Tunup Avannaanut ingerlaarput sajuppillatsitsilluni misissuinerit, 7 – 10.000 km-erinik isorartutigusumi ingerlanneqartussat, aallartereersut uppernarsariartorlugit. Sajuppillatsitsilluni misissuinerit, TGS NOPEC, Norgemeersunit, umiarsuup nipit atorlugit sajuppillatsitsissutinik ingerlatillutik kalinnerisigut ingerlanneqarput. Ulloq unnuarlu sapaatit akunnerni arlaqartuni 10 sekund-ikkaarlutik immap iluata qaangajaani nipimik 258 dB-imik sakkortussusilinnik aallartitsisassaspput. Inuup tusaasinnaasaanut assersuutigissagaanni timmisartorsuup motooriata 50 meter-inik ungasitsigaluni nipitussusaannit arfineq pingasoriarluni nipituneruvoq.

Sajuppillatsitsinerit nunap ilaani Kalaallit Nunaanni naalakkersuisut uumasut, soorlu qilalukkat qernertat, aarrit aammalu arfiviit nungoratarsinnaasut, illersorniarlugit tikiffigeqqusaanngitsutut nalilernikuusaanni ingerlanneqarput.

”Issuttumi avannaarsuani taamak annertutigisumik sajuppillatsitsilluni misissuinerit pilersaarutigalugillu ingerlanneqarneri takusinnaallugit aarlerinaqaaq. Ingammik pinngortitami ataqatigiinneq qajannareertigisoq arfernullu ulorianarsinnaanera eqqarsaatigalugu. Taamaammat mianersorluinnartoqarnissaa pissusissamisoorsorinarpoq sualummik taamatut misissuinerit issittumi uumassusilinnut, soorlu qilalukkanut qernertanut, qanoq kinguneqarsinnaanerisa ilisimaneri killeqarmata”, Dr. Oliver Boisseau oqarpoq.

28. aggusti 2015

Narwhals Breach in US © Glenn Williams / National Institute of Standards and Technology

Uuliasiortut suli unitsissinnaavagut
Nunani issittuni avannarlerni uuliasiorneq ingerlanneqaleruttorpoq, sapaatillu akunnerata siuliani Shell issittup imartaani Alaskap avannaani uuliasiornissamik akuerisaavoq, naak innuttaasunit demokratiskiusuneersumillu USA-mi præsidentinngorniarluni qinigassanngortittumit Hillary Clinton-imit tamanna akerlerineqaraluaqisoq. Kalaallit Nunaata imartaani Cairn-ikkut skotland-imeersut Nuup Qeqertarsuullu avataani 2011-imili uuliasiorlutik qillerimmata qillerisoqaqqinngilaq, ingerlatsiviilli uuliasiortut, ilaatigut Shell, Statoil DONG-ilu dansk-iusoq, qillerinissaminnut piareersarput.

”Tunup Avannaa suli uuliasiortunik qillerisoqalinngilaq, sulilu qillerisoqalinnginnissaa pinngitsoortissinnaallutigu. Ingerlatsiviilli, soorlu Shell amma DONG uuliasiornissaminnut akuersissutinik pissarsisimalereersimapput maannalu suleqatigisatillu qillerinissaminnut periarfissaminnik ujartuillutik. Issittumi uuliasiortoqannginnissaa pisariaqarpoq, silap pissusaata allanngornissaa ajunaarutaasoq pinngitsoortinniassagutsigu”, Sune Scheller, Greenpeacep Arctic Sunrise-mi projekt-imi aqutsisuusoq oqarpoq.