This page has been archived, and may no longer be up to date

Inuit Greenpeace suleqatigalugu seqinisaatinik ikkussuipput

Nutaarsiassat - septembari 19, 2016
Canadap issittuani Nunavummi Clyde Riverimi inuit ikummatissamik dieselimik isumalluuteqarunnaarusupput.

Taamaattumik Greenpeace suleqatigalugu seqinisaatinik 27nik ikkussuipput­ siullertut katersortarfimminni ikkussuillutik. Clyde River nunarsuarmi illoqarfiit avannarpasinnerit ilagaat.  
  
Jon Burgwald, Greenpeace Nordenimi issittumut tunngasuni akisussaasoq, ima oqarpoq: 
  
“Clyde Riverermiunit assorsuaq tikilluaqqusaavugut. Seqinisaatinik ikkussuinermi, inuit peqatigalugit ikummatissanik isumalluuteqarunnaarnissamut annikikkaluamik alloriarsimavugut. Anguniagarput suli tikinngilarput,  kisianni neriuutigaarput imatut iliuuseqarnermi issittumi suliniutissanik assigusunik pileritsatsitsissalluta”. 
  
Clyder Riverermiut uuliasioqatigiinnut ukiut marluk matuma siornali akerliusalerput, Greenpeacep tapersersuineratigut eqqartuussivikkut sumiiffimmi imaani sajuppillatsitsisarluni misissuinerit unitsinneqarallarnissaat anguneqarsinnaasimavoq. Misissuinerit qoqernaqisut ima ingasatsigaat, miluumasut, soorlu arferit, tusaassaannik aaqqinneqarsinnaanngitsumik ajoqusiisinnaallutik. Uumasoqatigiit attaveqatigiissinnaanerannut kingunipiloqarsinnaalluni.  
  
“Baffinip kangerliumarngata aamma  Ikersuaq Davidsip imartai assigiinngitsunik miluumasoqarfiupput, taakku kulturitsinnut pinngortitamullu naleqquttumik inuuniarnitsinnut pingaaruteqarput. Imaani sajuppillatsitsisarluni misissuinerit unitsinneqanngippata, inooriaatsitsinnik aseruisinnaapput,” Clyde Riverimi siornatigut borgmesteriusimasoq,  Jerry Natanine oqarpoq.


Clyde Riverip katersortarfianut seqinisaatit kusassaataasumik maanna 
ikkussorneqarsimasut, Greenpeacep umiarsuaanit Arctic Sunriseimit assartorneqarlutik tikiunneqarput. 
  
“Pingaaruteqarpoq peqatgiilluta uulisioqatigiiffinnut takutissagipput, nukimmik minguitsumik  uuliamik minguttuminngarniit perusunnerungatta. Clyde Riverermiut ingerlatseqatigiiffissuarnut naaggaarput, tamannalu naaggamik isumaqarpoq. Assersuutitut qilalukkanik qernertanik puisinillu illersuineq illoqarfiup siunissaanut pingaaruteqarpoq, taamaattumillu inuit naaggaarsinnaatitaapput,” Jon nangilluni oqarpoq.  
 
Issittumili allami ajuusaarnaqisumik uuliamik ujaasilluni misissuisoqarpoq. Kalaallit 
Nunaanni augustip 22­anni imaani sajuppillatsitsisarluni misissuinerit aallartinneqarput. 
Umiarsuit pingasut maannakkorpiaq Kalaallit Nunaata kangiata avannaarsuaniipput. Umiarsuit norskit ingerlatseqatigiiffiannut TGS­NOPECimut sullissipput, assigiinngitsuniillu uuliasioqatigiiffinnit akilersorneqarput. Umiarsuit pingasuusut ilaat, Akademik Lazarev, russit pigisaat qoqernaqisunik qaartitsisarpoq. Taanna finlandmiut sikusiutaannit aamma norskit ikiuutitut umiarsuaannit tapersersorneqarpoq.