30. novembari 2016

 

Canadap kangiani inuiaqatigiinnguit ikitsut inuit, tusaamavallaanngisavut najugaqarput. Canadap Kalaallit Nunaatalu ikerasaani kangerliumanersamiipput pinnersorsuarmi, takornariaqarfissuup Ilulissat kitaanut akerluinnaani illoqarfeeqqami Clyde Riverimi. Inuiaqatigiinnguit 1000-inik inuttussuseqartut ukiuni tusintilikkaani kulturikkut inooriaatsimikkullu pinngortitamut nunarsuup sinneranut sanilliullugu sakkortusinnaasartumut naleqqussartuarsimapput.

Clyder Riverimili inuit maannamut immaqa aatsaat taama ilungersunartigisumik qaangerniangassaqarput.

Inooriaasaat inuussutaallu Canadami Naalakkersuisunit ilungersunartorsiortinneqarput, Clyde Riverip sineriaata imartaani suliffeqarfissuit uuliasiorsinnaanerat akuerineqarmat.

Suliffeqarfissuit pineqartut ilagaat norgemiut TGS-NOPEC, Kalaallit Nunaata imartaanittaaq uuliasiorlutik misissuisimasut. Imaani nipimik sajupillatsitsisarlutik misissuiniarput, nipip maligaasaai immap naqqata tungaanut qaartinneqartassapput, nipip maligaasaatalu utersaarneranni ersersinneqassaaq immap naqqani sumi uuliaqaratarsinnaanersoq.

Taamatut misissuinermi  ajornartorsiutaanerpaajuvoq nipip maligaasai qoqernaqisut imaani miluumasunik qimaatitsiinnaratik ajoqusiisarmata, soorlu sumiiffimmi qilalukkanut qernertanut puisinullu.

Uumasut Clyde Riverimi inuit inuussutissarsiornerminni pisariaqartilluinnarpaat, tassami pinngortitami naatitsiinnarsinnaanngillat nerisassaminnik pisiniarfimmilu nioqqutissat timmisartumik tikisitaammata akisoqaat, maani akigititanut sanilliussagaanni aammali Clyde Riverimi inuit isertitaat annikinnerujussuungamik. Clyde Riverimi pissutsit pillugit videoliaq takujuk: https://youtu.be/ZCaRXmPVe_0

Canadami naalakkersuisut uuliamik misissuisoqarnissaanut akuersiinnanngillat, aammali inuit Clyde Riverermiut qulaatiinnarlugit akuersipput, nunap inoqqaavisulli immikkut pisinnastitaaffeqarput - Canadami Nunallu tamat akornanni inatsisit naapertorlugit- tunngaviusumik tusaaneqarnissaanut tunngassuteqartunik pisinnaatitaaffeqarlutik.

Pisumi matumani oqaloqatiginnissimanerit qulaajarneqarmata paasineqarpoq amingartorujussuusimasut uukapaatitsiniarpalaartuusimasullu.

Pisortanit aallartitaasut apeqqutinut naliginnarnut erseqqissumik akissuteqarsinnaasarsimanngillat, soorlu imaani uumasunut kingunissat pillugit apeqqutinut aammali nerisassaqarniarnissamut isumalluuteqarnermut tunngasunik apeqqutinut.

Taamaammat Clyde Riverermiunit suliaq Canadami Eqqartuussiviit qullersaannut suliassanngortinneqarpoq, aqagulu suliarineqassalluni.

Suliamut allamut assigusumut peqatigitillugu suliarineqassaaq, Canadami nunap inoqqaavinit, Chippewanit suliassanngortitaasoq peqatigissammagu.

Canadap oqaluttuarisaanerani siullerpaamik nunap inoqqaavi Eqqartuussiviit qullersaat tikillugu suliaqartitsissapput.

Naatsorsuutigineqarpoq aalajangiisoqarnissaanut sivisujaassaasoq, ullorli manna oqaluttuarisaanermi pingaaruteqarpoq, nunap inoqqaavisa nunaminni oqartussaaffeqarnerannut pisinnaatitaaffiit eqqarsaatigalugit aammali issittumi pinngortitamut mianernaqisumut pingaaruteqarpoq. -taamaattumik neriuutingaara nunap inoqqaavinut tapersersuinerit takutikkumallugu piffissaqalaassasutit ugguuna atsioqataallutit.