Greenpeace Issittumi

Qupperneq - juli 9, 2015
Issittoq assigiinngisitaarfioqaaq. Issittumi pinngortitaq tujorminarsinnaallunilu peqqarniitsuuvoq - peqatigitilluguli aamma sunnertiasuujulluni. Silap pissusiata allanngoriartornera, sermip aakkiartornera, umiarsuit ingerlaarfissaat nutaat nunanilu tamalaani ingerlatseqatigiiffissuit imaani sikusartumi uuliamik qalluinissamik kissaateqarnerat periarfissanik nutaanik ammaassivoq, aammali issittup uumasuinut inuinullu aarlerinarluinnartunik pilersitsivoq.



Issittumi pinngortitamik avatangiisinillu illersuiniarnermik Greenpeace suliniuteqartuuvoq, Kalaallit Nunaanni, Qalalersuup eqqaani imaanilu sikusartumi, Ruslandimit Amerikap avannarliup tungaanut. Taamatut suliniuteqarnermi imaani nunamilu uumasut naasullu pineqarput, kiisalu aamma uuliasiorlutik aatsitassarsiorlutillu ingerlatseqatigiiffiit Issittumi soqutigisaannut ingerlataannullu tunngatillugu ammasumik oqartussaaqatigiinnerlu tunngavigalugu aalajangiiniartoqartarnissaa sulissutigalugu.   


Issittup illersornissaanut Greenpeace pingaarnerusunik pingasunik anguniagaqarpoq:

  • Issittumi uuliasiorluni misissuineq qalluinerlu inerteqqutaassaaq

  • Qalasersuup eqqaa Sikuiuitsoq kujallertulli nunarsuarmioqatigiit ataatsimoorussaralugu pigalugu eqqissisimatitsiviussaaq. Sumiiffik nunarsuarmioqatigiinnut kingornussassaq nunanit tamalaanit eqqissisimatinneqassaaq, nunallu naalagaaffiillu piginagulu oqartussaaffigissanngilaat.

  • Piujuaannartitsinissaq tunngaviginagu aalisarnerup unitsinnissaa anguniarlugu aalisakkerinermik suliffissuaqarneq aqunneqartariaqarpoq, aamma imartani siornatigut aalisarfigineqarsinnaasimanngitsuni, imaatali sikuata nungukkiartornerata ilutigisaanik ammariartortuni aalisarneq utaqqissaagallartumik unitsinneqassaaq.

Issittup illersorneqarnissaanut erseqqissunik periusissiaqarnissaq

Issittumi avatangiisit assigiinngitsunit tatineqaraluttuinnarput: silap pissusiata allanngoriartorneranit, aalisapilunnermit, piujuaannartitsinissamik tunngaveqanngitsumik aallaaniartoqartarlunilu piniartoqarnertarneranit, nunap iluani uuliasiornermit aammalu aatsitassarsiorluni suliffissuaqarnermit, unammilligassanik periarfissanillu nassataqartunit.

Greenpeacep uuliasiornermut uranisiornermullu tunngatillugu, piiaaveqarnermut aammalu piniarnermut aalisarnermullu tunngatillugu suliaqarnera periusissianik erseqqarissunik anguniagassamillu toraagalinnik toqqammaveqarpoq, taakkulu issittumi inunnut uumasunullu tunngatillugu pissutsit piujuaannartitsinissamik tunngaveqartumik sivisuumillu atasinnaanissaannik qulakkeerinninnissamik siunertaqarput.  

Greenpeace aamma nunat tamalaat isumaqatigiissutaat iliuusissatullu nalunaarutaat tunngavigalugit suliaqartuuvoq, ilaatigut Issittup Siunissaa pillugu Nunat tamaalat Isumaqatigiissutaat, Naalagaaffiit Peqatigiit Nunap Inoqqaavisa pisinnaatitaaffii pillugit Nalunaarutaat, Naalagaaffiit Peqatigiit Silap Pissusianut tunngatillugu anguniagai kiisalu Nunat tamalaat Arfanniarnermut ataatsimiititaliarsuata (IWC-p) malittarissai.