Issittoq silap pissusianit allanngortinneqarpoq

Qupperneq - juli 9, 2015
Nunarsuarmi silap pissusia allanngoriartorpoq nunarsuarmilu sumiiffinnut allanut naleqqiullugu nunarsuup silaannaa Issittumi sukkanerusumik kissatsikkiartorluni. Kissatsikkiartorneratigut sermersuaq imaatalu sikua aakkiartorput, tamannalu uumasunut inunnullu nunani issittumi najugaqartunut 4 millionit missaanniittunut annertuumik kinguneqartitsivoq.



Issittumi uumasut silap pissusianut aputeqarfiulluarlunilu sikoqarfiulluartumut naleqqussarsimasuupput, uumasoqatigiiaallu ilarpassuisa uumaniassagunik sikoqarnissaa pisariaqartilluinnarpaat. Sermip aakkiartornera uumasunut imarmiunut uumasunullu miluumasunut nunamiittunut, ilaatigut nannunut, annertuumik aarlerinartorsiortitsivoq.  

Silap pissusianik ilisimatuut naliliipput nunarsuup silaannaata kissatsikkiartornerata 95 procentia inuit pilersitarigaat, pingaartumillu suliffissuaqarnikkut CO2-mik aniatitsineq silaannaap kissatsikkartorneranut pissutaasoq tamatumalu malitsigisaanik sermeq sukkasuupilussuarmik aakkiartorluni.

Naalagaaffiit Peqatigiit Silap pissusia pillugu ataatsimiittartoqatigiivisa (IPCC) siulittuutigaat silap pissusiata allanngoriartornera taama sukkatigisumik ingerlaannassappat Issittup Imartaa ukiut hunnorujulikkuutaat inuuffigisigatta qiteqqussimalernerini aasaanerani sikueqqasalersimassasoq. Ilisimatuussutsikkulli misissuinerit kingulliit takutippaat tamatuma siusinnerusukkut pinissaa ilimanaateqartoq.  

Imaata sikua peeruppat sumiiffiit siornatigut tikinneqarsinnaasimanngitsut umiarsuarnik angallaffigineqarsinnaanngussapput aalisarfigineqarlutik uuliaqarneranillu misissuiffigineqalerlutik. Issittumi uuliasiorneq imminut assortortuuvoq, uuliamimmi atuineq - ikummatissanillu allanik, soorlu aamarsuarnik gassimillu pinngortitameersumik - Issittumi sikup aakkiartuleranut pissutaanerpaapput.

Issittumilu siku aappat tamanna issittumiinnaq ajornartorsiutaassanngilaq. Issittoq nunarsuup avannaarsuani 'nillataartitsivissuartut' atuuppoq nunarsuullu silaata pissusianik oqimaaqatigiissitsisuulluni. Tamannalu innarlerneqarpat nunarsuarmut tamarmut ajornartorsiutinngussaaq. Tamatumunnga peqatigitillugu sermit iigartartut aakkiartornerisa imavissuit qaffakkiartortissavaat, allaat Manerassuarmi qeqertaaqqani najugallit inuuniarnikkut toqqammavigisaat aarlerinartorsiortilerlugit.


Greenpeacep suliniutigisai

Naalagaaffiit suliffissuaqarnikkullu suliffeqarfiit Issittumi taamatullu nunarsuup sinnerani allanngoriartornernut akisussaaffimmik maannamit suli annertunerusumik tigusinissaat Greenpeacep sulissutigisaasa ilagaat.

Nunarsuup silaannaata kissatsikkiartornerata annikillisarneqarnissaa Greenpeacep sulissutigaa. Silaannaap kissatsikkiartornerata nunat tamalaat isumaqatigiissutigisaattut gradinik marlunnik qaangiinnginnissaa pingaaruteqarluinnarpoq. Ukiunili kingullerni ilisimatusarnerup takutippaa nunarsuup silaannaa gradimik ataasiinnarmilluunniit kissatsissagaluarpat tamanna maannamut ilimagineqartumit annertunerujussuarmik sunniuteqartussaassasoq.

Taamaammat Greenpeace aamma isumaqarpoq nunarsuup silaannaata kissatsikkiartornerata sapinngisamik annikinnerpaaffimmiinnissaa nunarsuarmioqatigiit sulissutigisariaqaraat.

1,5 gradinik anguniagaqarneq, naalagaaffinnit 100-nit amerlanerusunit taperserneqartoq - tassalu nunat silap pissusiata allanngoriartorneranik eqqugaareersut - anguneqarsinnaavoq. Iliuuseqarnissarli pisariaqarpoq!

Greenpeacep nunat naalakkersuisui, aalajangiisartut suliffissuaqarnermilu siuttuusut gassimik kissatsitsisumik aniasoqarnerata suliffissuaqarnikkullu allatigut mingutsitsisoqarnerata sukannernerusumik nakkutigineqarnissaannut iliuuseqaqqullugit kimigiiserfigisarpai. Tamannalu issittumut issittullu avataanut atuuppoq.

Silap pissusiata allanngoriartornera Issittormiunut erloqinartuuvoq, tamannalu Greenpeacep issittumi naalagaaffinnut tamanut Naalagaaffiit Peqatigiit Nunat Inooqqaavisa Inuiattut Pisinnaatitaaffii pillugit Nalunaarummut ilanngunnissaannik kajumissaaruteqarneranut pissutaasut ilagaat.

Greenpeacep aamma issittumi naalagaaffiit namminersortuunerisa aammalu pisussaaffigisaat pisinnaatitaaffigisaallu Naalagaaffiit Peqatigiit imaanut inatsisitigut oqartussaaffiit pillugit isumaqatigiissutaanni aalajangersarneqartut aamma tapersersorpai.