Issittumi qilleraluni uuliasiorneq

Qupperneq - juli 9, 2015
Issittumi qilleraluni uuliasiorneq issittumi avatangiisinut sunnertiasunut aarlerinarluinnartuuvoq. Imaani sikoqarfiusumi avinngarusimasumilu qilleraluni uuliasiorneq aarlerinarluinnartuuvoq, uuliakoortoqassagaluarpallu tamatuma katersornissaanut atortorissaarutinik issittumi peqarani. Taamaammat Issittumi qilleraluni uuliasiornerup inerteqqutigineqarnissaa Greenpeacep sulissutigaa.



Imartat nutaat ilaatigut sikuerussimasut Issittumi uuliasiornissamik soqutigininnermik nutaamik pilersitsipput. Silalli pissusia ajorluinnartumik kinguneqassanngippat atorsinnaarput sinnerlugu uuliaateqareerpugut. Taamaakkaluartoq uuliasioqatigiiffiit Gazpromitut, Shellitut Statoilitulli ittut Issittup Imartaani uuliamik ujarlernissamik qalluinissamillu pilersaarutitik ingerlatileruttorpaat.

Imartani avinngarusimasuni, silarluttupilussuusinnaasartuni, uuliamik qalluinissaq ima unammillernartigalunilu aarlerinartoqartigaaq, ajutoortoqarnissaanut piffissaq apeqqutaaginnarluni. Uuliamik maqisoorneq ajornartorsiuterpassuarnik pilersitsisarpoq, Issittumilu kingunerisassai annertuupilussuussallutik.

Siullertut, Nunat uuliasioqatigiiffiillu arlaannaalluunniit issittumi uuliap katersornissaanut teknologiimik pigisaqanngillat. Aappaattullu, uuliamik maqisoorneq imaani sunnertiasumi annertuumik sivisuupilussuarmillu ajoqusiissaaq, immap sikuata ingerlaartup uulia ungasissumut siaruaatissammagu aammalu imaata nillissusia pissutigalugu uulia imaani arrortinneqarsinnaassanngimmat.   

Uuliamik maqisoortoqassagaluarpat upalungaarsimaniarneq maanna annikitsuararsuuvoq. Taamatut suliaqarnerminni Danmarkip nunallu allat annaassiniarnissamut upalungaarsimatitaannit Search and Rescuenit (SAR) ikiuisoqartariaqarneranik pisariaqartitsiffiussaaq. Ungasissupilussuarmili taamatut pisoqarnera sikoqarneralu pissutigalugit uulia siaruaatissaaq sikullu ataanut pissalluni, tamannalu pissutigalugu Issittup avannarpasinnerusortaani saliiniarnissaq ajornakusoortupilussuussaaq.

Suliniaqatigiiffiit immikkullu ilisimasallit arlallit oqaatigaat Issittumi uuliamik maqisoortoqassagaluarpat tamanna sumiiffimmut ajornerpaarpaamik kinguneqassasoq, Frankrigimiullu uuliasioqatigiiffiiata Issittumi uuliasiornissaq unitsippaa uuliamik maqisoorsinnaaneq qanippallaartoq aammalu taamatut maqisoortoqassagaluarpat avatangiisinut kingunerisassai annertuupilussuunissaat tunngavilersuutigalugit.



Issittumi silap pissusiata allanngoriartornera

Uuliasiornerinnaq issittup imartaanut aarlerinartorsiortitsinngilaq. Issittumimi uuliasiorneq imminut assortortutullusooq ippoq, uuliamimmi - ikummatissanillu allanik, soorlu aamarsuarnik gassimillu pinngortitameersumik - atuinerup kingunerisaanik Issittup ilarujussuata sikuata aakkiartuleranut pissutaanerpaapput.

Nunarsuup silaannaata kissatsikkiartornera nunarsuarmi 'assigiissumik' pinngilaq, Issittumimi silaannaap kissatsikkiartornera sukkanerusumik pivoq. Issittumi silap pissusiata allanngoriartornera nunarsuarmi sumiiffinni allani silap pissusiata allanngoriartorneranut sakkortusaavoq, pingaartumik nunarsuup affaani avannarlermi.   

Greenpeacep suliniutai

Issittup Imartaani uuliamik ujarlernerup qalluinerullu unitsinneqarnissaannik Greenpeace suliniuteqarpoq.Tamannalu ilaatigut Kalaallit Nunaanni Namminersorlutik Oqartussat kimigiiserfigineqarnerisigut, ilisimasanik tunniussinikkut, attuumassuteqartut pillugit tusarniaanerni akissuteqartarnikkut kiisalu susassaqarfimmi akisussaassusermik takutitsinissaq siunertaralugu politikerinik oqalliseqateqarnikkut pisarpoq.

Tamakku saniatigut Greenpeacep uuliasioqatigiiffiit nunallu naalakkersuisui uuliasioqatigiiffinnik ilaannakkortumik tamakkiisumilluunniit naalagaaffinnit pigisaqartut, soorlu BP, Statoil aamma DONG, paasitinniarsaralugillu kimigiiserfigisarpai. Issittumi nunat naalakkersuisui akisussaaffeqarput, aammali nunat Issittup avataaniittut naalakkersuisui aamma periarfissaqarput uuliasioqatigiiffiit naalagaaffinnit pigineqartut Issittumi uuliasiunnginnissaannik piumasaqaateqarfigissallugit.

Greenpeace isumaqarpoq Issittoq illersorneqartariaqartoq, nunat tamalaat pituttuisumik isumaqatigiissuteqarnerisigut nunat Issittumi soqutigisallit piffissaq qaninnerusoq eqqarsaatigalugu aningaasatigut iluanaarnissaq pinnagu avatangiisinik pingaartitsinerunissamik pisussaaffilerneqarlutik.