珠峰登頂後，我來為氣候吶喊：黃偉建

香港最高峰大帽山，海拔957米，與珠峰8,848米猶如「蚊髀同牛髀」，但山嶺多高，都是一步步走來。阿建登山初體驗，源自曾經隱世的「城市浪漫」嘉頓山：小時候家住石峽尾徙置區，返學放學都會爬嘉頓山，但我們所謂「爬山」是爬樓梯小徑，阿建則是攀爬當時北九龍裁判法院（薩凡納藝術設計大學現址）後方的岩石，直至觸得到那座給飛機的訊號燈塔，「真係free solo，乜都冇，係會跌死嗰啲嚟」。

那些年嘉頓山Free Solo

長大後，阿建的運動技能「周身刀」，早於1993年參加香港馬拉松，現時更是專業運動訓練顧問。20年前參加外展課程首訪尼泊爾，卻在心底繫上登山情意結，「Mount Everest係全世界最高嘅山，好遠好遠都望到佢」。一刻戀上珠峰，隨之而來是剎那幻想：一生人有冇機會上去一次？但呢座山死好多人、好危險、好高喎！「真係好壯麗，當一座全世界最高嘅山喺面前出現，你會諗好多嘢。」

不征服不挑戰，只有天時地利人和

2018年5月17日，經過20年自我磨練，阿建初次嘗試便成功登頂，成為第九位登上珠穆朗瑪峰頂的香港人，稱為「壯舉」絕不為過，但他獲邀受訪與分享時堅持不說「挑戰」、「征服」，只歸功於天時地利人和，更在意流於「自high」，因此提及登頂一刻往往輕描淡寫：「逗留10幾分鐘，影幾張相就落番山。」說起登山前奏與後續，反而滔滔不絕。

1953年，Edmund Hillary團隊改寫了登山史，攀上當地人敬而重之、害怕惹怒的珠峰（尼泊爾語曰「山之母」Sagarmāthā），也改寫了尼泊爾的經濟命脈，每年4、5月登山季節，數十萬人蜂湧而至，成為無數嚮導、挑夫、酒館、商舖甚至政府的流金歲月。即使年月過去，但雪巴人對「山神」的敬重始終不變，出發前定會舉行長達三小時的祈福儀式，藉念誦經文、祈福求得心安。

本著登山者崇敬大自然的初心，阿建同樣入鄉隨俗：「祈福時我同佢講『山神，你畀一個好安全嘅日子我，上到去，留少少時間喺上面影幾幅相，欣賞呢個世界嘅美景之後，我就會落番去』。」

若真的有「山神」施法，可否驅散沿途所見各種冰川融化與污染？位處海拔5,180米的全球最高垃圾「堆填區」Gorak Shep，於阿建而言記憶猶新，「所有收集返嚟嘅垃圾，直接擺喺堆填區，冇分類，堆咗佢就算。我諗差唔多有10個香港咁大……一望無際，我只可以咁形容」。不過，他亦同時看見希望：有熱心人士在當地海拔3,800米地區努力建設垃圾轉運處，一旦建成，可望鼓勵登山者與村民守望相助，從山上帶走垃圾，共同守護美好環境。

冰隙的階梯：攀山者踏足的氣候變化

氣候變化在身邊，但每個人的感應截然不同，例如農夫慨嘆作物失收，沿岸居民承受颱風災害，而登山者也別有體會。阿建記得珠峰地區的夜晚不時傳來雪崩聲音，到清晨一覺醒來，數以噸計的石頭忽然「搬家」，登頂過後回到大本營更彷彿「時空錯亂」，「我個營都要搬過晒……之前個斜坡冇咗，好明顯個冰川融得好快」。

還有那條全球最大絨布冰川（Khumbu Icefall）上跨越冰隙的鋁梯：當高山積雪日間消融、夜間結冰，不斷冷熱收縮而產生隙縫，有賴當地的「階梯醫生」（Dr.Ladder），在登山季節前穩妥鋁梯，指引冰川前路。走過梯級一步一驚心，但冰川融化的痕跡同樣觸目驚心：「舊年去最多過三條梯，大約九米長駁埋，經過啲冰川，但睇番過往啲相，前幾年最勁去到五條梯，15米放過去好似鐵索橋……我問之前爬過嘅挑夫，佢哋話會塌㗎，呢幾年係融得好快。」

珠峰一方冰川流向尼泊爾，構成加德滿都淹浸威脅，另一方流向西藏，輾轉經冰川流落長江。在阿建看來，尼泊爾舉國早已關注氣候變化，內閣成員更曾在珠峰大本營召開會議，呼籲全球行動，「比我哋切身感受更大」。

建立香港人的極地數據庫

「香港好多人都去嗰邊行山、爬山，10幾人都爬咗上世界最高峰，但未有人去關注氣候變化議題，同香港人講番尼泊爾山區污染、氣候變化點樣影響居民同登山人士。」2003年起成為綠色和平行動者，從抗議中環填海、推動兩電發展可再生能源到守護大堡礁都有阿建的身影，「行動帶來改變」的精神，加上去年因雪崩等因素未能連攀兩峰的遺憾，催生了即將展開的洛子峰旅程。

未來個多月，阿建除了會與當地村民及雪巴人嚮導訪談，了解他們如何應對切身氣候變化，亦會以影像記錄冰川融化與污染真相，還雄心壯志為建立一個記錄地球第三極（世界屋脊，其他兩極就是南、北極）氣候變化的資料庫開荒，此行會找尋、確認地標，藉此徵集香港山友在珠峰範圍的第一身見證：「下年到你上basecamp，去番同一個位置影張相，已經可以做簡單對比，到10年、20年後，可以建立一個資料庫囉！」

「冇人講全世界最高座山啲冰融緊，因為冇咩人會去到當地見證，新聞採訪隊唔會，（唔攀山嘅）科學家唔會，只有我哋爬山人先會去嗰度。點會有攝製隊爬到咁高，揸住機都行唔郁……所以我希望從一個攀山者角度，將『冰川融化影響世界』呢個訊息話畀所有人聽。」

「識行山嘅人，一定唔會污染大自然」

能一登珠峰之巔，畢竟是少數，但阿建認為行山友以至香港人可以做的事，多不勝數，例如低碳生活、反思消費模式，「而家啲嘢好唔襟用，爛完你發覺cheap cheap嘢可以扔咗佢再買過，好過你用更多錢買襟用嘅嘢……但啲嘢唔係壞，你唔識整咋喎」，甚至是培養一種「慢活」態度，「慢活就係你要enjoy一件事情，唔好逼自己好快完成……當所有嘢變得快，你會用好多即棄產品，思維上你唔會用再重用嘅嘢」。

只緣身在此山中，獅子山也好，洛子峰也好，環保宗旨始終如一。「我哋團隊會將所有垃圾拎走，做得好足。世界各地都係咁嘅指引，你上得國家公園就要將全部垃圾拎走，要磅你、睇你、做record，有啲甚至連大便都要拎走。你就算行過飛鵝山、獅子山、西貢都好多垃圾，唔係因為嗰座係最高嘅山而去扔，而係人嘅行為有冇盡應負嘅責任。」

「我諗真係識得行山嘅人，一定唔會污染大自然。」從未知到了解，從了解到珍惜，就是阿建攀登洛子峰的信念，與香港人一同見證氣候變化的理由。

阿建今日（4月6日）正式出發，展開攀登洛子峰之旅！綠色和平會為您跟進阿建旅程中如何見證氣候變化的影響，一起傾聽來自8,516米的「氣候告急」吶喊。