余日東：香港絕對係一個雀鳥天堂
離開市區，走進米埔，雀鳥聲逐漸脫穎而出，卻似一種畫外音，只聞其聲，難見其蹤。鳥語喧嘩之間，「咕~咕~咕~咕~四聲杜鵑」，鳥類專家余日東（阿東）指引我們瞧向頭頂樹蔭或遠方枯枝，從兩隻白鳥認出誰是小白鷺，觀察「匙羹嘴」顏色辨識雛鳥、成鳥。
阿東說，小時候他選擇了雀仔，長大後黑臉琵鷺卻選擇了他──保育二十年，終由「極危」到「脫瀕」在望。也許更確切的說，觀鳥給了他一片快樂與自由的天堂，他也在守護香港這片看顧超過550種鳥類的雀鳥天堂。
聽聲辨鳥，在採訪一行人眼中猶如某種戲法或超能力，阿東只是輕描淡寫，以四字記之曰：感情、經驗。「聽雀就似聽音樂，記音階高低，記個pattern，就記到隻雀。或者有人鍾意車，聽引擎聲就知咩車款。」
他多次利申「唔係咁難」，一切只是點滴累積的學習與經驗：「有隻雀叫『黑眉擬啄木』，喺華南其實好普通，我去廣東睇過好多次，正正香港仲未有。我累積咗經驗，知佢點叫、點嘅樣，2014年有次去大埔滘，突然俾我見到，嗰吓『叮』一聲，就係香港新記錄。」
11歲初次到米埔戀上觀鳥，輾轉於1987年加入香港觀鳥會，1998年起全身投入黑臉琵鷺保育工作，當時數目僅得約700隻，被國際自然保護聯盟（IUCN）紅色名錄評為「極危」。回到80年代，黑臉琵鷺初受關注時更只得二、三百隻，「我問番啲前輩，佢哋講黑臉琵鷺真係會絕種，真係會絕種」。
研究統籌，資料分析、發放，開會尋求合作空間，廿年來的保育日常看似簡單，背後卻有縝密考量：怎樣「活化」數據予不同機構，怎樣提供機會讓公眾參與，還須持續進修研究方法。
「雀仔會飛會移動，今日數呢度，聽日數第二度，可唔可以比較？要知道用咩方法，畀個框框佢。例如黑臉琵鷺普查，基於觀察同過往記錄，雀仔（一日）飛唔到幾百公里，到冬天亦唔會再遷徙，於是冬天揀一日，所有地方同時間做。」
文章目錄
「脫瀕」在望，黑臉琵鷺卻是「擠迫戶」
上月公布的普查結果，黑臉琵鷺自有紀錄以來首次突破四千隻，甚至有望脫離「瀕危」，阿東說來冷靜也不失振奮。「一路做到而家四千隻，80年代尾講緊二、三百隻，你不能講話冇成績。做保育嘅，每日垂頭喪氣多過乜，亦係咁樣（黑臉琵鷺）支持我一路做工作、睇雀。」
「脫瀕」尚未成功，保育仍須努力之餘，不少隱憂還有待解決。例如米埔度冬雀鳥數目，十年間下跌四成，由九萬隻跌至不足五萬隻，背後牽涉濕地變質、農地發展壓力等因素；即使黑臉琵鷺數目上升，所需河口、泥灘、濕地未有相應增加卻受破壞威脅，猶如「寬敞戶」變「擠逼戶」。
他坦言目前未能百份百保證黑臉琵鷺長久安穩，必須尋求更多棲身之所，「大家都知香港對土地問題最敏感，你要發展但我要搵地方畀雀仔住，可想而知難度有幾高。」
「你有冇用番6,000億做保育？」
守護黑臉琵鷺的路途固然崎嶇，明星物種以外的保育路更難行。七個環保及關注團體早前發表研究，指出東大嶼水域具生態價值，而非政府推銷造價最少6,240億「明日大嶼」填海工程時宣稱的「生態敏感度相對低」。其中鄰近填海選址的周公島，發現國家二級保護野生動物白腹海鵰的鳥巢，阿東正是當中的「目擊證人」，「一去到就見有對成鳥喺上空飛緊，成鳥通常寧願自己搵食，兩隻成鳥有可能係繁殖緊，最後就見到有個鳥巢」。
很多人只看見荒島、雜草與爛泥，香港為數不足50隻的白腹海鵰卻視為樂土，而這類位處食物鏈頂層的大型猛禽，棲居「石屎森林」當中亦確實難得，「有一個保育價值喺度」。
「會唔會白腹海鵰或者中華白海豚上升到某個數目，你先開始填海？」是狂想，也是真心一問：「點解要破壞咗先保育，而唔係保育同發展取得平衡。」保育是細水長流，花上數十年光景，投放大量人手、資源，才能建立和諧共存的環境，而非急就章破壞。但就他所見，更多時連等價交換、取得平衡的努力也欠奉，「你用$6,240億起人工島，有冇用番6,240億做保育？我覺得兩者係對等，點解你搞一個地方，會畀少咗錢保育番佢？發展同保育力度唔對等，結果只係用保育包裝發展。」
四面牆外，看見香港無限美
在米埔觀鳥屋受訪期間，阿東依然記掛窗外風景，不時拿起望遠鏡遁入鳥兒天與地，「你睇吓，啱啱有隻猛禽嚇到佢哋，佢哋就飛起」。望遠鏡就像伸手可及的出口，30年來引領他從小蝸居奔向大自然。小時候看著名生物學家大衛艾登堡（David Attenborough）紀錄片，到圖書館借閱動物圖鑑，在荔園似懂非懂動物被囚之痛苦，夏天跟隨父母到沙灘觀賞魚蝦蟹，就是他翻越家中四面牆的童年回憶：「咁樣一個concrete block、一棟building，你可以做啲咩，就算有望遠鏡都係望得丁咁多嘢，麻雀、有時一兩隻相思……你知道自己鍾意成為大自然一部份。」
若說「冇腳雀仔」嚮往自由，阿東另一方面卻更深深立足我城，「好多人講香港咁細，雀仔飛咁多地方，（保育與否）冇咩所謂，但每個地方都咁諗，咪冇人保護雀仔？我呢個地方，香港，保育得好，係對自己一個責任，亦係做一個榜樣、一個例證」。
留意雀鳥消息、認識物種資訊、與親友分享故事，甚至支持相關團體、參與公眾諮詢、親身出外觀鳥，他相信你我每一個人都值得享受香港海闊天空。「好多人俾四面牆圍住一生，真係唔知香港有幾好。香港縱使咁細，但好多雀睇，郊野景色好靚，絕對係一個雀鳥天堂、生物天堂。」
搵唔到食點算？我睇雀先
問阿東可有想過不做雀鳥保育會做甚麼，「大鑊，係好大鑊嘅問題」。其實毋須刻意提問，社會氛圍自會提出「搵唔到食」的嚴苛挑機。「我話『老咗咪老咗，冇點算，我睇雀先』。當然你用其他嘢衡量，朋友有好多嘢我真係冇，但我冇所謂，呢度somehow有幾百隻雀陪我，就係咁囉。」
也許是同一種堅持與信念，讓阿東從容面對保育路上各種難題，見證日漸成熟的郊野林木吸引新鳥種來港棲息，在這片千多平方公里範圍照料500多種雀鳥的彈丸之地，努力建立一個包括不同動物在內的宜居城市，繼續細聽鳥兒喜報天亮，期待下次與牠再遇見。
「我相信好多人去過南生圍，都覺得香港係好好嘅地方，黑臉琵鷺就喺你側邊行過。你試吓同外國朋友講，天水圍出面條渠又有，南生圍又有，屋企出面就有瀕危物種，佢即刻哇一聲。」
「我唔相信我哋要破壞大自然先搵到好嘅地方住。香港人有地方住，亦有雀仔嘅地方，我絕對相信做得到。」
