抗疫、走塑一齊贏！食肆老闆4大實戰心得

新冠肺炎疫情當前，愛護環境的你面對即棄塑膠用量激增，不免多了內心交戰，但我們真的沒有選擇餘地？不論小店或大集團，很多有心餐廳繼續推動走塑，避免擊退疫情後墮進另一場環境災難。綠色和平早前舉行「抗疫點走塑？你問我答」網上分享會，邀請叙福樓集團主席及行政總裁黃傑龍（Simon），以及西餐小店Space cafe & kitchen店主Yvonne，和你分享防疫下走塑的堅持與成效，一起抗衡膠災大流行。

早前有環保團體推算，香港人在疫情期間每星期耗用一億件塑膠餐具^[1]，無疑使Yvonne等出心出力源頭減廢的社區街坊晴天霹靂。「大家好專心抗疫，但冇為意喺生活另一方面都有影響。」她位於牛頭角的西餐小店Space cafe & kitchen一直歡迎走塑，有感膠災數字驚人，於是自3月中大力推動自備容器優惠及租用餐盒計劃，經街坊口耳相傳，於第三波疫情高峰期間愈來愈多人支持，「每日一定有人畀餐盒。」

Yvonne走塑小檔案

餐廳：Space cafe & kitchen️
走塑措施：
1 自備餐盒減$3
2 顧客預付$50按金，就可租借可重用餐盒買外賣
3 從街坊收集多餘的玻璃樽，洗淨後裝入自家製的沙嗲醬及咖喱醬出售
成效：高峰時每日「10個8個客」參與

雖然小店與集團經營模式大不同，但Simon的叙福樓集團旗下食肆一直也有環保措施，包括早年不忍被割鰭棄身的鯊魚在沙灘痛苦掙扎，而推廣無翅婚宴；去年5月起推動走飲管，至今已節省40萬支，「最初要飲管收多1蚊，俾人鬧到暈，後來調轉唔要飲管減10蚊，從此冇人鬧，仲多咗人飲嘢。」第三波疫情來襲時，他亦推出「外賣自取體驗」，以堂食器皿送上食物，交由客人放進自攜餐盒，兼享折扣優惠。

Simon走塑小檔案

餐廳：叙福樓集團旗下38間分店
走塑措施：
1 自攜餐具買外賣，可享低至6折優惠
2 走飲管$10優惠
成效：478人次參與「外賣自取體驗」，平均每日廿多宗

1 給顧客：做足消毒工序，自己洗最乾淨

不過，食環署職員上月底巡查Simon其中一間分店，指市民晚上6點後在餐廳內自行入盒，也可能違反堂食禁令，令他無奈叫停。「我覺得係好橋，食環署覺得係屎橋。」這卻無阻他另覓「執枱專員」新政策，安排同事分開執枱與傳菜流程，釋除交叉感染疑慮，避免堂食也要耗用即棄餐具的終極災難，更獲得專家認同。

至於Yvonne則充份發揮親力親為打點小店的優勢，也慶幸員工上下非常支持走塑，讓食客安心自攜餐具：「所有自備盒都會拎入廚房，用滾水淥一淥，做好基本消毒，再同客人溝通好邊個盒載啲咩，佢哋都好有信心。」事實上，科學研究指出，新冠病毒可依附塑膠表面長達3日，因此即棄餐具絕非防疫保證，還是自己做好消毒及個人衛生，才是抗疫真功夫！

2 給飲食同業：環境都係成本，尋求可持續經營

最近晚市堂食全面停頓，不少食肆苦苦支撐，再談環保，會否百上加斤？Yvonne笑言「認真咁答，係人格分裂」，例如提供不鏽鋼飲管取代即棄飲管，或者物色材質較易分解的餐盒，必然涉及成本考量，但她更關注下一代面對環境危機何去何從，「真正嘅成本唔在於金錢，而係要承受環境成本，下一代、海洋、氣候變化，都係成本。」

Simon則坦言經營連鎖店較多制肘與既定程序，但一個政策修訂便有力造成廣泛影響，他亦不吝把環保方案公諸同好；而且就如上述走飲管例子，推動環保也可以增加生意及節省成本，最重要是店主以可持續經營模式，好好照顧自己，「如果企業為咗環保做到虧損，撐唔落去，都係冇意義，只會劣幣驅逐良幣。」

綠色和平項目主任Sion亦分享了兩個外國案例，包括英國有企業推行牛奶「按樽」網購^[2]、新加坡則有初創App提供外賣可重用餐盒服務^[3]，證明環保也可開拓新商機！

無奈要用即棄餐具？外賣減塑小智慧

Yvonne：
1 善用外賣App「走餐具」選項
2 店員可將味道相宜的食物放在一起包裝，減少餐盒消耗
Simon：
1 迫不得已使用即棄餐具後，盡量洗乾淨重用或妥善回收
2 店員可善用現有包裝減少額外消耗，例如火鍋生蛋以原有蛋盒包裝

3 給走塑新手：互相溝通，唔使怕麻煩！

追求方便，可能是香港人根深蒂固的觀念之一，對走塑卻步或遲疑，除了自身便利，也有網民問到：自攜甚至帶錯容器，會否麻煩了廚房和店鋪？本身也會自攜餐具的Simon笑言：「關心環保嘅客人，本身人品質素都偏高，make sense好多。」他覺得不要因過份疑慮阻礙行動，即使第一次容器未必適合，最多也是用一次即棄餐盒，之後就能順利走塑！而Yvonne也同意使用客人自備餐盒並非甚麼麻煩事，只要互相溝通，走塑其實唔難，「客人落單時知道要幾大、幾多個盒，有冇湯水汁醬，就會揀到適當容器同餐具！」

4 給700萬人：勿妄自菲薄，香港可以係環保社會

近至香港膠災泛濫，遠至格陵蘭冰蓋融化，各種環境絕望真相之中，你我堅持力挽狂瀾，不讓自己後悔未盡全力。Simon分享了兩個小故事，一個是在更注重環保的太太與女兒下達膠樽「禁令」後，兩、三年來未嘗購買樽裝飲品；一個是在諮詢委員會打破沉默，呼籲停用樽裝水獲眾人響應──只要鼓起勇氣發聲、行動，就有可能一呼百應，「700萬人都有『自己可以做乜』呢個概念，就係相當好嘅環保社會。」Yvonne亦認為小店以至個人毋須妄自菲薄，逐步改變生活，影響力可以好大。「每個人都有唔同生活節奏，點樣配合環保，改變生活習慣。唔好睇小每一句說話。」

進一步走塑？你可以做的3件事

感謝超過60位市民參與分享會並踴躍提問，正如有網民留言：「兩位嘉賓都好有heart，令小眾感到我哋嘅同溫層一啲都唔薄弱。」其實每個願意從日常生活實踐走塑的你都是有心人，保重身體繼續抗疫之餘，以下3件事歡迎你一起參與：

• 逢星期二參與#Tuesplasticfree Challenge，於社交網站分享走塑成果，為同路人打打氣！
• 我們已成功推動百佳與惠康踏出減塑第一步！還需要你加入「超市卸裝」聯署，加快減塑步伐，讓顧客有得揀
• 支持綠色和平「全城走塑」行動，拓展18區走塑版圖，邁向1,000間走塑店鋪里程碑！

^[1] 綠領行動數據
^[2] 環境資訊中心報導
^[3] Green Queen報導

延伸閱讀：
5個家中抗疫的減塑貼士
【綠色抗肺炎】系列文章