【調查手記】落現場睇棕地亂象 8米高垃圾山的震撼
電子垃圾，猶如香港環境「房間裡的大象」──霸佔土地、重金屬污染、增加堆填區壓力等禍害，人人略懂一二，傳媒也做過深度專題，卻依然老是常出現。如何再次聚焦並連結至善用棕地、毋須破壞自然的關係？
「落現場囉！成日討論冇咩用。」於是綠色和平團隊5個人，兩個月瓹窿瓹罅，追查全港逾70個地點的努力，換來的至少35處共逾20公頃棕地涉違規作業、高達8米的「垃圾山」，廢料甚至瀉出圍板、有工場7種重金屬超標的見證，以及一份記載各種荒誕的《此亂棕起：棕地亂象調查報告2021》。
文章目錄
前線體會：「打地鼠」執法永遠追唔切
「有冇用啱方法？」
「幾有心去執法？」
「願唔願意做到我哋咁？」
團隊成員受訪時反覆好幾次的疑問，不因為整次調查證據唾手可得，反而是過程費盡心血：每次擬定路線、每張航拍相片、每個土壤樣本，得來不易。「今次都係一個提醒同推動力：有啲嘢其實仲係好有價值，值得我哋去繼續揭露、探索。」
出發前擬定6、7日路線走訪70多個目的地，當地村民及作業者對外人相當警戒，「試過有次佢哋駛車經過，見到我哋時，特登停低落車，問我哋喺度做咩。」加上工場有重重閘門、圍板，調查過程要找合適位置、找時機，善用GoPro、航拍機等工具快閃紀錄，並要判斷當中的危險性。
這次調查揭示到棕地亂象日趨嚴重，甚至有恃無恐地堆積8米高的垃圾山，靠民間團體場外觀察也調查出來；反之，執法人員擁有公權力稽查違規作業，甚至進入場內搜證，理應可做得更快更好，檢控數字卻一直偏低：例如「四電一腦」法例2018年實施後，環保署首一年多僅錄得兩宗成功檢控，罰款共3,000元，可謂隔靴搔癢；綠色和平3年前曾揭發的違規電子垃圾拆解場，至今亦依然運作，業務更進一步擴展。
再者，經營者另起爐灶亦幾乎無後顧之憂，就像上白泥綠化地帶一個已荒廢工場丟空4年，仍見遍地電子廢物碎片，任由超標重金屬毒害環境。「好似『打地鼠』咁，扑完呢度即刻瓹去第二度違法經營， 零星執法追唔切架喎。」
「所以真係政府要有整體棕地規劃，對方先會少啲機會混水摸魚。」
追趕潮流：鋁廢、滑板車成新寵
除了場面震撼，知識衝擊亦不遑多讓。例如坊間普遍認知的電子垃圾，不外乎電腦、電視、雪櫃、洗衣機或手提電話，今次卻湧現一些「新面孔」，例如外國收費電視解碼器，以至幾千架囤積有待拆解的電動滑板車。「經營者處理嘅產品愈嚟愈『納雜』，坊間亦越嚟越多不同種類嘅電子產品，例如電動滑板車其實都含有對環境有害嘅電池同電路板，咁政府部門有冇相應知識同準備，知道處理呢啲電子垃圾嘅工場都需要規管呢？」
另一個難解謎團，就是厦村的8米高垃圾山由甚麼形成？團隊初期茫無頭緒，嘗試循塑膠方向調查，但現場視察所見及從物料硬度等線索找到鋁廢料為「疑兇」，再透過多番相片及分揀程序比對、諮詢回收業者等步驟fact check，才確認相關廢料是鋁廢碎料，亦與中國年初禁止進口固體廢物，令香港鋁廢碎料上半年進口量異常飆升的背景脗合，由此推算出幾座垃圾山經清洗及分揀後的價值高達數以億元。
「全球金屬、資源價格升得咁犀利，作業者就有利可圖，但當中夾雜咗唔少塑膠垃圾、電路板、建築廢料等垃圾，睇怕都係傾倒堆填區，變相代價就是由全港市民同環境埋單。」
實地求真：震撼畫面畀市民見、畀市民知
「非法拆解電子垃圾至今已經存在十幾廿年，但政府搞極都搞唔到？」調查成員之一如此憤慨，全因親眼所見圍板之外上有金屬粉塵飄揚、下有黑色污水滲出，加上航拍垃圾山的震撼畫面，均指出問題規模難以想像。「政府當局有幾多係實地走訪過，真係有去了解香港棕地現況係點？遲遲唔規劃，搞到充斥咗好多亂象！」
「我去航拍完都覺得震撼，真係忍唔住想問：『唔通垃圾就有地，起樓就無地？』。政府成日講香港唔夠地，但原來咁多土地用嚟收埋廢料，所以要揭番出嚟畀市民見、畀市民知，等大家望番，棕地亂象其實都係關自己事。」
而綠色和平早前率先向傳媒發佈調查結果，上周一（6/9）亦在Facebook Live完成「亂世驚人」研究報告解說會，以及製成故事地圖作公開資料，讓土地公義議題持續曝光：全面規劃並發展棕地，毋須向郊野、海洋開刀。