最新消息

Homepage主頁

如何支持

專題報導 氣候
3 mins

【Lance X Greenpeace】化身小主持談冰川危機 氣候少年:而家要行動!

作者: 綠色和平

香港疫情近日再次反彈,很多活動暫時停頓,但11歲本地氣候行動者劉衍一(Lance)繼續和你「#FridaysforFuture」,一起長知識!Lance上周五粉墨登場,夥拍綠色和平資深項目主任Frances主持《冰川上的氣候危機》網上座談會,並邀請攀山運動家黃偉建(阿建)與超過80位參加者分享極地氣候見聞。上完寶貴一課,Lance學到了甚麼?「要話畀朋友聽,呢件事係存在、嚟緊,係而家要解決嘅問題!」

「大家好呀!歡迎嚟到綠色和平《冰川上的氣候危機》,我係今晚主持之一Lance Lau!」醒神的開場白,為座談會揭開序幕!因應疫情嚴峻,埋位前大家都做足社交距離與防疫措施,3位主持、嘉賓亦全程戴上口罩,保障彼此健康。

綠色和平資深項目主任Frances(左起)、少年氣候行動者Lance與攀山運動家阿建,於《冰川上的氣候危機》座網上座談會分享氣候議題。 © Greenpeace

綠色和平資深項目主任Frances(左起)、少年氣候行動者Lance與攀山運動家阿建,於《冰川上的氣候危機》座網上座談會分享氣候議題。 © Greenpeace

是次座談會嘉賓阿建,既是第9位登上珠穆朗瑪峰的香港人,去年更與綠色和平合作,在攀登全球第4高峰、海拔8,516米洛子峰(Lhotse)的旅程期間訪問當地民眾,直擊冰川上的氣候危機。剛巧碰上颱風「法尼」去年5月吹襲印度,觸發山區風雲變色,阿建即使走遍名山大川,亦坦言從未見過這般極端天氣:「上緊6,000米為登頂作適應時,成座山係震緊。我爬咗廿年山,第一次上山會打風,當地人都話冇可能。一晚之間,成個營地俾雪冚晒,惟有折返。」

一條鋁梯就能跨越冰隙,是登山者的喜訊,也是氣候危機的證據。 © Greenpeace

一條鋁梯就能跨越冰隙,是登山者的喜訊,也是氣候危機的證據。 © Greenpeace

直視雪崩 「氣候變化可能變災難」

對一期一會的攀山者而言,氣候危機看似鋪平了某些眼前路:只須一條鋁梯就能跨越絨布冰川的冰隙,比以往5至10條更安全。「對爬山人士係好事,但對大自然唔係好事,因為冰川正式話畀大家聽,佢融得好快。」而氣候危機不過以其他面貌呈現,例如本地媒體去年廣泛報導的珠峰「人龍」,因最適合攻頂的好天氣僅得兩日,令滯留隊伍的登山者增加迸發症風險:阿建更即席播放當時親身拍攝的雪崩片段,只見冰雪從高處傾瀉而下,「紮營唔敢靠近山邊,都好驚架,每晚都聽到不斷咁冧,半夜一定要醒,唔出嚟嘅話真係有機會被埋。」

阿建在洛子峰頂拉起橫額,呼籲大眾正視氣候危機。 © Greenpeace

阿建在洛子峰頂拉起橫額,呼籲大眾正視氣候危機。 © Greenpeace

而對倚山為家的居民而言,從前的堅固冰川,如今不再可靠。有年輕登山嚮導說小時候連綿的冰川消退至只有砂石,環保領袖則懷緬冰上「捉伊因」的童年時光,植物異常生長更令冰川非一般「綠化」。「氣候變化唔只影響都市、大自然、雪山、極地,都已經陷入氣候危機。甚至如果我哋唔好好保護環境,危機可能會變成災難。」

鄰居打氣 爹哋「亂入」

完成座談會後進入問答環節,參加者都非常踴躍提問,其中意想不到的是有東涌鄰居為Lance打氣!住在同一屋苑的機電顧問Patrick,分享了自己如何結合環保與風水,向圍村居民及長者推廣綠色理念;他說留意到Lance很努力在社區宣揚氣候訊息,因此特意參加座談會,並鼓勵年輕一代「唔使怕醜,多啲同長輩講要出一分力」,證明Lance的行動絕對有人共鳴!

來到問答環節中段,有參加者Gabriel提出「高難度」問題:「而家疫情之下,對人類嘅未來、同大自然嘅關係,我哋從中可以學到咩啟示?」Lance猶豫了一會,還是交由阿建回答:「大自然有自己作息,去到極端狀態就會作出調適。好似早兩年颱風『山竹』,嘔番晒啲發泡膠出嚟──地球講唔到嘢,只能透過自身情況話畀你聽,需要作出改變。」原來Gabriel就是Lance的爸爸!利申:絕非做「媒」,因為Lance在座談會後也笑言:「老竇做咩問咁深……(笑)」其實父母非常支持他,希望他一路會更進步!

【#本地話題 - Lance X Greenpeace 線上座談會 - 冰川上的氣候危機】

【#本地話題 - Lance X Greenpeace 線上座談會 - 冰川上的氣候危機】今日我哋有年僅11歲嘅本地氣候行動者劉衍一(Lance)主持座談會,連同香港攀山運動家黃偉建一齊傾氣候危機!首位登上世界第四高峰洛子峰嘅港人阿建,將同大家分享佢喺登山過程中經歷嘅種種氣候危機現象例如雪崩、颱風、融冰等,阿Lance亦都會分享點解佢要咁堅持參與氣候行動。一齊加入綠色和平 X Lance守護氣候嘅行列,立即聯署 > https://act.gp/394RI2T#氣候危機 #凝聚小力量拯救大氣候---------------------------------------------立即Follow綠色和平Instagram > http://bit.ly/2Vs7XQj馬上訂閱綠色和平YouTube Channel > http://bit.ly/2F6gxyt為維持公正獨立,綠色和平從不接受政商界資助,只依靠你一樣熱心市民捐款支持 > https://act.gp/2ToVoDw

Posted by Greenpeace 綠色和平 - 香港網站 on Friday, July 17, 2020

無人勢弱言輕 「肯定可以做番啲嘢」

說到底,冰川上的氣候危機,關我咩事?曾參與民安隊撲救山火行動及植樹修復的阿建說,無論城市炎夏或冰川融化,香港山火或澳洲森林大火,都是唇齒相依,亦在提醒我們行動時機就在當下:「因為大自然被燒毀,你發覺自己都係一分子,冇大自然其實生存唔到。成個生態系統都係『藤㨢瓜,瓜㨢藤』。」而行動從來不只一條路,例如阿建會在家中設立回收箱,與囝囝一起分類、拆解、清潔,才交到妥善回收點;Lance也說不一定要像自己在校門外舉牌,少用即棄塑膠、乘搭公共交通工具、多菜少肉,是每個人身體力行創造未來可做之事。

超過40位參加者出席《冰川上的氣候危機》線上座談會,與Lance及阿建探討氣候危機。 © Greenpeace

80多位參加者出席《冰川上的氣候危機》線上座談會,與Lance及阿建探討氣候危機。 © Greenpeace

任務完成,Lance感覺如何?「睇到無論住喺沿海定山上,居民生活同樣受到氣候危機嚴重影響,處處都睇到暖化警號。」滿意自己表現嗎?「喺疫情下仲可以主持節目,非常好!氣候變化並冇因為疫情而慢落嚟,所以氣候行動都唔可以停落嚟!」

總結整個座談會,Lance的表現甚為淡定,問答環節解釋微塑膠禍害時頭頭是道,也不忘cue大家聯署拯救氣候及大合照,「開cam一齊影張相~」,頗有主持風範。也許就像他的結語分享:「冇人會因為能力、年紀太小而不能有所作為,人人都肯定可以做番啲嘢。只要你願意,而家開始行動,就一定推到你好想要嘅嘢,而喺我嘅角度就係氣候危機。」

延伸閱讀:
【和你講氣候變化】有請香港年輕氣候行動家Lance Lau劉衍一
【和你講氣候變化】少年氣候行動者Lance 劉衍一的氣候日常與綠色未來