世紀暴雨後重建狗舍 守護500浪浪 流浪狗「媽媽」：風雨同路 今生無悔

此心安處是吾家，對於無所依靠的流浪動物，不論突如其來的暴雨、曠日持久的高溫，都是潛在致命的威脅。去年世紀暴雨期間，香港流浪狗之家創辦人 Angela 留守狗場與浪浪同歷劫，儘管因水浸損失慘重，仍決心汲取教訓、做足適應措施，希望給 500 隻浪浪一個遮風擋雨的家。

「幾困難都好，都會盡力幫啲狗狗，同佢哋風雨同路，因為我哋係佢哋唯一嘅朋友。」

「哈囉『Pizza』！呢隻係我嘅『Chicken』！」在流水嚮的香港流浪狗之家，每隻浪浪都有一個刻在 Angela 心底的名字，也有牠們各自的身世故事。見另外兩隻浪浪「肥婆基」與「Marco」精靈活潑，難以想像牠倆曾經因為極端天氣而徘徊鬼門關。

汲取世紀暴雨教訓 勤通渠、墊卡板

每次暴雨襲港，「新界多區水浸」幾乎成為例行公事，以至天文台也特設「新界北部水浸特別報告」向市民通報最新狀況。同樣情形，也在 2023 年 9 月 8 日的世紀暴雨時出現，Angela 更直言「係我幾十歲人未經歷過，亦都未見過咁嚴峻嘅環境」。

「突然間啲水全部沖曬入嚟，有一剎那個水位係上到我心口。」其實 Angela 當日已跟同事、義工提早準備，把體弱狗隻優先安置室內，並用沙包築起屏障，卻仍低估了洪水泛濫程度，唯有緊急疏散更多狗狗到較高的地方；而當時身型較矮小的「肥婆基」一直跟在身旁。「驚㗎，啲水浸得好快，佢就好搏命游番返去，同埋我捉住佢，最後嗱嗱聲擺番佢入屋。」

經過徹夜無眠的掃水、清渠工作，Angela 當下放低心頭大石，回過神來才發現狗場滿地泥濘與雜物，電器全被浸壞，糧食、床單、毛巾亦被水沖去，心噏之餘也見證香港人間有情，在有心人踴躍捐贈物資下重建這個家，今年亦採取多項措施，務求提升防洪能力。

「而家一落大雨，我哋就會喺門口堆起三、四排沙包，同埋挖多咗兩條渠；我每個禮拜都會通兩次渠，確保佢唔會塞。另外再買咗好多卡板，墊起啲雪櫃、洗衣機、物資同糧食，做好一切預防措施。」

曾拯救中暑狗狗 40°C靠大風扇降溫

2024 年截至首八個月，你我慶幸香港尚未發生嚴重暴雨或水浸事故，但氣候危機仍潛藏另一「無聲殺手」：屢破高溫紀錄的酷熱天氣。Angela 形容炎夏期間，狗場的環境溫度可高達 40°C ，須出動多把強力風扇降溫，亦要在中午時份全場灑水，讓狗狗濕身消暑。

「呢個就係以前中暑嗰個小朋友，而家好番啦！」Angela 一邊拍拍「Marco」的頭，一邊憶述幾年前人狗相遇的故事。原來她幾年前收到山友通知，在山上有狗隻中暑，便準備好救援物資出動。「當時佢已經行唔到、唞唔到氣，於是我哋抱佢落嚟，用濕毛巾鋪晒全身，再喺佢胳肋底、肚同頭夾啲冰，幫佢降溫。」面對氣候危機挑戰重重，她坦言唯有從經歷中學習。

「我會照顧佢哋終老」

由退休人士化身浪浪的「Angela 媽媽」，更於 2013 年成立香港流浪狗之家，源於她經常目睹瘦弱或患病的流浪狗聯群結隊奔往垃圾站覓食，慨嘆在文明社會「點解仲有啲咁嘅事情發生」。為了應付浪浪們龐大的醫療與糧食開支，她曾經賣樓籌錢，即使如今轉型為慈善機構，依然勞心勞力，就像今次訪問也是在她上、下午兩次帶狗外出覆診之間的空隙匆匆完成。

在狗場收容的逾 500 隻浪浪當中，不少都是體型較大的唐狗，要為牠們尋找好歸宿殊不簡單，但 Angela 的承諾鏗鏘有聲：「如果冇人領養嘅，我會照顧到佢哋終老。」

「見住佢哋嘅生命，就好似一支支就嚟熄滅嘅蠟燭重新燃亮，好開心咁喺狗場跑來跑去，我覺得都係值得。」當浪浪們不再面目模糊，而是我們的摯親、好友，義無反顧便顯得理所當然。

「你問我會唔會重新再選擇一次，我都係會再揀番呢條路，今生無悔。因為對我嚟講，佢哋已經唔係狗狗，係我嘅家人。」