最新消息

Homepage主頁

推動改變

專題報導 生活
5 mins

美人魚黃夏蕙,無畏愛海洋

作者: 綠色和平
「美人魚,我細細個就夢想:逍遙自在,喺個海度游來游去。」若人生如海,88歲的黃夏蕙經歷過風高浪急,今天已能笑看潮漲潮退,惟有社會事堅持不平則鳴。眼見政府倒行逆施推銷「明日大嶼」填海工程,「夏蕙姨」決意化身美人魚,守護香港海洋這個家。

每年上頭炷香一刻,黃夏蕙的百變造型總帶來不少歡樂,「咩造型都試過,12生肖咩都扮過,係美人魚冇機會做。今次開心到癲,好似夢境成真」。只要攝製隊請食糖,美人魚就會充滿力量,訪問時又不停開心share花絮照片,夏蕙姨娛人娛己的正能量,從不止「自high」咁簡單。

她說過,上頭炷香是眼見好友一個一個離世,更希望祝福身邊人健康;而今次化身美人魚,亦是為了守護心愛海洋。

拍拖滑水 與海結緣

影片截圖

「我屬於大自然」,是夏蕙姨的口頭禪,而比海還深的自然記憶,源自雙十年華。那些年拍拖,另一半揸船出海,游水、滑水、遊船河無所不歡,「我好犀利㗎,當時可以由西貢滑到去中環!」現在仍會因出海看不到中華白海豚而失落,到夏威夷拍攝時照樣「膽粗粗」夜潛,延續與海洋的邂逅,「海洋好多生物,魚蝦蟹好多生命,你填咗佢,將生命全部整死晒」。

Fb發聲8年無休 「驚都要講」

「海係用黎欣賞,唔係用黎填架,咪鬼搞大嶼山呀!」去年「守護大嶼」遊行當日,夏蕙姨在社交網站「出po」聲援,獲得逾600個「讚好」及「心心」。識睇睇留言,有人道謝,有人讚譽良心藝人,亦有人說抽水。網絡風雲色變,她卻顯得游刃有餘,「香港人都好大方,都講道理」。

而夏蕙姨肯定不是忽然抽水──從2012年D&G禁攝風波、貨櫃碼頭工潮、「山竹」襲港後聲援打工仔,都有她的身影,去年亦為火燒南生圍抱打不平:「今次就著住衫影寫真,下次再燒,我就實行讓半球或者唔著衫咁影,實行抗議呀!」8年來每日更新facebook,連經理人都笑她沉迷,她只覺貫徹關心社會的精神,以事論事,「所以自己去學同網民溝通,每日都學緊嘢」。

贏得網民美譽「女神」、「bb」,但演藝圈的「紅線」似乎日漸不容逾越,何以無畏無懼高調反填海?「其實我都驚,不過我係香港人,為咗香港,為咗環境,驚我都要講。」

以慈悲之心 認真詰問

夏蕙姨的願望之二是老有所依、人人有屋住,成立慈善基金也為興建老人院。有地,真係唔要?除了珍重海洋,她對守護大嶼還有浮想聯翩,例如奧運金牌,「如果冇海,邊有李麗珊幫香港攞金牌?」例如佛門淨土,「全世界都鍾意去大嶼山,想睇香港最靚嘅大佛,有山有水,點解要將佢毀滅?」說起不同土地供應選項,卻頭頭是道,句句到肉:

談填海:「填海幾時填得嚟?你而家咁多地,點解唔用?填完海都冇錢起樓。希望各位見到,美人魚都要俾人救,要本住慈悲之心,愛護咁靚嘅海洋。」

談棕地:「我地唔係冇地!如果真係冇地就冇嘢講,但只要政府肯做……我住新界,成日周圍都見到有棕地,點解有易做嘅嘢唔做?」

談粉嶺高球場:「咁大個高球場,又唔係個個打得起,又唔係日日打,仲要係租唔係買嘅。政府話拎番高球場,既然拎咗就即刻去做,優先規劃空地,『士急馬行田』。」

以市民福祉為先,區分優次緩急,就係咁簡單,其實夏蕙姨一句講晒:「用多啲錢,起多啲『平民屋』(公營房屋),先可以解決燃眉之急!」

「東方之珠」全因自然美

拍攝當日,一行人前往取景海灘,須走20分鐘頗陡峭的山路。夏蕙姨雙腳也許不太靈光,卻毫無怨言行下去,還不停鼓勵大家:「我行到,我行到呀!」守護香港的路同樣難行,而夏蕙姨同樣堅持,「我日日都係咁講,政府有冇聽我話?所以要眾人力量,為自己、為社會一齊出聲。」

因為相信這道風景,不只她一個珍惜。

「香港點解叫『東方之珠』?就係因為大自然風景咁靚。」