最新消息

Homepage主頁

如何支持

專題報導 生活
3 mins

Melody鄭律韻山林的法則 「環保唔係0同100」

作者: 綠色和平

打開鄭律韻(Melody)的IG,一張張行山靚相標註愛護郊野訊息,又淨過高山又淨過灘。這位環保KOL卻坦言忙碌生活也有軟弱時,有賴大家多體諒少「鬥綠」,人人皆可成為環保Leader!綠色和平會員服務部早前舉行「山林的法則:和你行山不留痕」線上行山會,邀請Melody與30多位支持者分享行山心得,一起從山野拾遺做起,守護香港環境美麗依然。

Melody(右)和「山林的法則:和你行山不留痕」線上行山會主持、綠色和平街頭籌款團隊成員Alem(左),與30多位支持者分享環保與行山心得。 © Greenpeace
Melody(右)和「山林的法則:和你行山不留痕」線上行山會主持、綠色和平街頭籌款團隊成員Alem(左),與30多位支持者分享環保與行山心得。 © Greenpeace

千島湖旺過旺角,流水響人頭湧湧,郊野就像個大樹洞接收鬱結與悶氣,卻一併被迫承受污染惡果。Melody等16位義工,去年2月與綠色和平及「香港山女」前往大帽山,短短半日就執拾了70磅垃圾,更有不少場面大開眼界。

「嗰日真係嚇親,大石中間滿佈垃圾,最多係食物包裝同飲品,仲有成個威士忌樽喺草地、一包尿片喺山坡邊,煙頭都好誇張,多到執唔晒。」

淨山驚見尿片、威士忌

Melody小時候常與家人共享周末行山樂,近年受朋友薰陶再次愛上行山和越野跑,全因鍾情與自我對話的靜心空間。最近一窩蜂的行山熱也許放大了個別陋習,但她覺得我們與山野的距離其實一直慢慢收窄:見過塔門牛牛整條麵包連袋吞食,山火連連的馬鞍山充斥大量煙頭,對膠袋聲格外敏銳的金山馬騮成為打卡「吉祥物」,唯有多走一步幫助大自然這位好朋友。

Melody去年參加綠色和平「行山抗疫不留痕」活動,見證山上垃圾種類繁多,包括手上的酒樽。 香港山女授權使用照片
Melody去年參加綠色和平「行山抗疫不留痕」活動,見證山上垃圾種類繁多,包括手上的酒樽。 香港山女授權使用照片

對我嚟講大自然係朋友,唔係資源或者工具咁簡單。當我哋喺佢身上獲得好多,珍惜同保護都係必須。就好似我哋唔會對陌生人有好感,第一步先去接觸呢位朋友、親近大自然,至會在意佢多啲,再做多步淨山、淨灘。」

四個山野拾遺貼士
1 選定路線
2 安全至上
3 清理垃圾裝備:口罩、手套、夾、垃圾袋
4 帶備兩個垃圾袋,一個盛載可回收物品
* 詳見《四個山野拾遺貼士 -- 安全最重要》文章


行山不留痕(Leave No Trace)七大準則
1 事前規劃準備
2 在能忍耐人類踩踏的山路行走和紮營
3 自己垃圾自己帶走
4 保持原有風貌,不移動和帶走任何屬於自然的物品
5 減少生火,例如只在政府指定的燒烤場或營地生火
6 尊重野生動植物,勿打擾其作息
7 尊重其他山友及附近居民
* 詳見《守護抗疫「後花園」的七大守則 》文章

做畀自己睇 環保總有共鳴

KOL的社交媒體動態,大多把最完美一面展現人前,IG followers過萬的Melody,卻坦言不是天生愛環保,改變契機也來得神奇,「有日喺街度望到人扔垃圾,唔知點解好想問『點解會扔落垃圾桶?』好似只係轉移問題去堆填區,唔係真正解決,嗰吓就覺得睇唔順眼,想改變。」

Melody(前排中)不時舉辦及參與淨山,其中煙頭可謂最常見垃圾種類之一。 Melody提供相片
Melody(前排中)不時舉辦及參與淨山,其中煙頭可謂最常見垃圾種類之一。 Melody提供相片

由食物包裝一步步做起,「買麵包用少個膠袋」,繼而改用竹牙刷、手工梘,再成為素食者。萬事起頭難,她說實踐下去不太難,但也免不了掙扎與失守:「有排生活比較忙同攰,的確有啲『心虛』、少咗分享。之前我唔畀自己買薯片,因為鋁箔袋唔可以回收,亦未必鍾意嗰種upcycling產品,但嗰段時間咩都唔想諗,肚餓就想食。」

不過環保唔係做畀人睇,而係畀自己睇。呢刻做差咗,面對番自己,實踐番價值觀就會滿足。而且繼續以身作則,自然會有人主動問,因為你堅持做好事,啲人都會想了解點樣一齊做。」

因此她主要透過Story分享綠色生活小事,以開心、輕鬆態度鼓勵踏出第一步;前年參與綠色和平《超市走塑大作戰》真人騷後,也繼續響應#TuesPlasticFree Challenge,延續走塑挑戰之餘,更體諒香港人的生活難處,才能更有效推動環保。「有時街市閂咗,得番超市,而家真係儲咗好多膠,希望超市快啲走塑。」

從素食到塑膠回收,Melody透過社交媒體動態與followers分享生活小事中的環保訊息。 Melody提供相片
從素食到塑膠回收,Melody透過社交媒體動態與followers分享生活小事中的環保訊息。 Melody提供相片

發散嚟做 和你山上見

其實綠色和平會員服務部正籌劃每月會員活動,也很期待疫情退散後能復辦淨山,到時Melody說不定是參與一分子──原來她一直有捐助不同環保機構,當中對綠色和平從不接受政商界捐款、保持公正獨立的精神印象深刻,「好似堅守大嶼咁,可以直接出聲」。

重聚之前,讓你我暫且各自修行,以淨山心得為記有緣相見。「盡量着長褲同行山鞋,帶足夠食水補給,幫路線搵多啲撤離點;如果去淨山,我會先喺物流站執啲夠厚實嘅袋。因為好多垃圾出乎意料,有載滿蠟好重嘅月餅罐,又有尖銳玻璃,保障自己安全又帶得走。」

Melody提提你:著緊山野不留痕之餘,也要謹記裝備充足,才能享受郊遊樂。 Melody提供相片
Melody提提你:著緊山野不留痕之餘,也要謹記裝備充足,才能享受郊遊樂。 Melody提供相片

環保唔係0同100,唔使逼得自己太緊。想享受、舒服唔係錯,只係咁啱生於呢個社會,有咁多唔環保嘅事情。有時市民先係『受害者』,希望商業負番起個責任。」

「一個人走100件膠可能好難,但如果發散嚟做,100人、1,000人各減一件,就會更輕鬆達到。」

延伸閱讀:各式行山路線及攝影攻略!【Hill民Story】系列文章