本地生態攝影師馮漢城：野生物種是「活生生的藝術品」

馮漢城（阿城），香港生態攝影師。曾出品《Wild Hong Kong》系列生態紀錄片，被譽為「港版discovery channel」，他鏡頭下的本地野生物種包括水鳥、麥氏擬腹吸鰍、溪吻鰕虎魚等等。阿城投入生態攝影多年，感受過與大自然相處的快樂與辛酸時刻，並覺悟到人類在自然環境中只是十分渺小，卻造成太多破壞。阿城感嘆大自然給人類的驚喜往往是意想不到，野生物種是「活生生的藝術品」，他期盼香港人可以同心合力，守護香港「野」。

難忘與水鳥四目交投，拍攝郊外「藝術品」

進行訪問的早上，一身「街坊裝」、「踢拖」的阿城在沙田花心坑與我們見面，他說：「我喺呢度長大，細細個成日走上山接觸生態，嗰陣仲未有相機，單單係用肉眼睇到啲動物，已經好滿足。」寥寥數句剖白，一身輕裝，我們已經感受到阿城與大自然的親近，並沒有一般城市人與野外環境的隔膜。

阿城自中文大學生物系畢業後，便投入生態攝影行列，拍攝過香港鳥類、魚類、昆蟲等。談到最深刻的攝影經歷，阿城指出與水鳥的互動最觸動到自己：「水鳥多數是海邊或濕地見到嘅雀仔，佢哋唔怕人，所以可以同佢哋距離好近，甚至伸手可及。有個時刻我覺得好奇妙，就係同佢有眼神接觸，有交流，嗰下好感覺到佢有生命力，係活生生一個個體。見到佢哋有時踱步，有時搲毛，完全當我透明，感覺好神奇、滿足。」

因為與動物曾有過心靈連結，阿城更不願看到人類破壞動植物自由自在的生活，摧毀大自然的純真：「我覺得野生物種好似活生生嘅藝術品，因為佢哋有不同顏色、羽毛、行為，會同你交流，呢個就係接觸生態的有趣之處。我做生態攝影有個宗旨，就係用客觀、記實嘅方式記錄大自然，唔會涉手改變環境，如果用急功近利嘅角度出發，你就會係大自然裡面好失敗。人類喺大自然入面好卑微、渺小，應該遵守返大自然嘅法則，用幾多拎幾多，唔好做多餘破壞。」

發展與保育並不對立，以鏡頭守護香港野

然而，人類對大自然的破壞從未間斷，明日大嶼、開發郊野公園等計劃，無一不是直接破壞野生物種的生境。對於城市發展，阿城的感概頗深：「龍尾興建嗰個人工沙灘真係令我失望，明明集合咁多人嘅力量，發現嗰度生物多樣性咁高、有稀有物種，依然不敵發展巨輪，保留唔到。」他坦言基建工程對生態帶來嚴重破壞，例如填海會將整個海洋的面貌改變，不論生物的適應力、求生意志有多強，都只會落得死亡的下場。

阿城續指香港的生態特色在於，一個彈丸之地竟蘊藏高山、河溪、濕地、低地、海洋等多類型生境，生物多樣性豐富，珍貴的資源是我們觸手可及，難忍看著環境變得面目全非，動物無家可歸。問到阿城認為一般市民可以做甚麼守護香港「野」，他回答：「大家有唔同崗位，我做生態攝影，有朋友可以推動環保教育、宣傳，亦可以喺土地運用方面，同當局反映生態係值得保護嘅。我認為當土地運用得宜，例如利用荒地等等，發展同保育其實唔係對立。」

人類雖然渺小，但守護郊野力量可聚沙成塔

適逢2021年國際生物多樣性日，阿城與綠色和平合作舉辦「與生態專家探索香港『野』」網上教室」，夥拍生態與環境教育家馬昀褀博士（Dr. Xoni Ma）向公眾講解香港生物多樣性。對於這次合作，阿城希望能分享自己生態攝影的心路歷程，他提及曾有人不太了解生態攝影，問自己：「香港有生態㗎咩？點會影到呢啲嘢啊？」因此他期望透過作品展示本地生物多樣性何其豐富，從而令大眾懂得欣賞野生物種，最後自發去保護他們。

「我覺得個人力量雖然微小，但近年大眾對郊野認識稍稍加強，亦有團體做好多環保項目，例如綠色和平比較前衛少少，做咗好多唔同工作去守護香港生境、本地物種。」阿城總結道，「咁大家都係香港一分子，我希望大家力量可以聚沙成塔，守護香港『野』。」