聲音導航《山海大嶼》生態紀錄片 陳志雲：大嶼本身就係白天鵝

綠色和平與本地得獎製作團隊歷時大半年製作《山海大嶼》紀錄片，多角度呈現大嶼生態面貌與環境破壞。全片除了以航拍、水底及夜視拍攝手法呈獻，當然不少得聲音導航──我們邀請到本地資深傳媒人陳志雲（Stephen）為本片旁白，全方位帶領觀眾了解大嶼山富生物多樣性、值得香港人驕傲的一面，同時愛護在他心中毋須蛻變已是美麗「白天鵝」的一座大嶼山。

「每人心中都有一座大嶼山……」《山海大嶼》片首開場白，由Stephen娓娓道來。而他心中的大嶼印象則來自大澳：因小時候舅父家住「水鄉」，滿載童年回憶。棚屋風景、蝦醬味道，還有街坊彼此相識、共享資源的鄰里情，皆讓他深感大嶼與繁囂都市之別。

「有人話過大嶼山係『醜小鴨』，如果將佢發展，就會變成『白天鵝』，但喺我心目中，大嶼山本身就係白天鵝。呢度係一個天然公園，同埋一個冇受到城市污染，生活模式好唔同嘅地方。」

最愛「清道伕」米蝦 難忘貓頭鷹餵哺

所謂「只緣身在此山中」，Stephen坦言縱使大嶼山予人感覺舒服自在，但最初獲邀為紀錄片旁白，一時無法想像「有咩拍呀」，直至親自觀賞過由4位土生土長香港年輕人組成團隊，耗時大半年上山下海、通宵逗留野外拍攝20個物種的珍貴時刻，頓覺「不識大嶼真面目」。

「係呀！係（廣東）米蝦，佢哋好趣緻，成個『清道伕』咁，整到河底好乾淨。」即使事隔幾個月受訪，談起《山海大嶼》片中最難忘的物種，依然眉飛色舞：「仲有鵰鴞，貓頭鷹爸爸媽媽飛走咗，要帶嘢返嚟食。呢啲生物之間all connected嘅關係，都係我哋平時好難睇到。」

生態與生命 彼此相連

說到這句啟發自電視劇對白的"It's all connected"，亦概括了Stephen的環保理念。尤其過往幾年由郊野「邊陲」建屋到明日大嶼，香港自然環境屢被放置「發展」刀口之下，《山海大嶼》亦實地記錄了傾倒泥石、船隻超速航行等人為破壞，以及中華白海豚擱淺沙灘的心痛畫面。綠色和平一直強調自然住屋不對立，並與專家合作從生態、土地規劃、公共財政多角度發表紮實研究，說出真相，促請政府全面規劃及善用棕地，撤回嚴重危害海洋生態的「明日大嶼」填海計劃。

對於各種爭議，Stephen有個直截了當的答案：一切都是環環相扣。「香港生態值得保護，因為人嘅生命值得保護。」

「保護環境，係講緊成個生態系統，好似機器有好多齒輪，唔係破壞一種生物就一種生物，而係條鎖鏈咁，甩吓一粒又一粒螺絲，成個生態環境就可能會散。喺邊度生活都好，對全地球人類都係一件壞事。」

5小時精心旁白：感受香港幾咁值得我哋珍惜

《山海大嶼》片長25分鐘，Stephen與團隊卻花了足足5小時才完成錄音，期望精益求精，讓每位觀眾聽出當中肺腑之言：「一句說話，用唔同腔調，可以帶出唔同訊息。點樣反映地貌嘅珍貴性，點樣表達環保訊息，再從頭聽一次，睇吓邊度要執。」

今次為《山海大嶼》獻聲，Stephen表示支持從不接受任何政府和商業機構贊助的綠色和平，捍衛獨立性和中立性保護環境之餘，同時欣賞本地年輕團隊記錄香港生態的努力，製作水準更堪比外國紀錄片。他亦寄語觀眾在日常生活做好源頭減廢、山野不留痕，「好多生活細節加埋就係大數目」，當然少不得收看及廣傳《山海大嶼》紀錄片。

「如果你要認識大嶼山多啲，真正認識香港多啲，千祈唔好錯過《山海大嶼》紀錄片。同埋唔好淨係睇一次，睇完可以再睇，你可以感受到大嶼山同香港有幾靚，幾咁值得我哋珍惜。

仲要盡力將紀錄片廣傳開去，畀更多生活喺香港嘅人，認識我哋香港同大嶼山多一啲。」