SEA OUR HOME 參展藝術家專訪：願人類與海洋共存

美麗的大海，是景，更是家。然而理應是賓至如歸的家，在懾人的波濤之下，海洋生物卻無處可歸……

綠色和平 7 月 1 至 16 日於中環 PMQ 元創方舉辦《SEA OUR HOME 守護海洋・藝術家居展》，以家居佈置為整體概念，並由 3 位本地藝術家—插畫家 Isaac Spellman 巫男、Maf Cheung 毛毛球與樹脂藝術家 Rolland Cheung，以各自擅長的藝術媒介演繹人類與海洋之共存關係，帶領觀眾探訪海洋這個家的不同角落。

即日起只要簡單完成登記，你便可於蒞臨觀賞展覽時換領限量明信片！

Maf Cheung 毛毛球：巨大化動物 珍惜香港每道微小

巨貓現身怡和街天橋「躲貓貓」、大蝸牛擋在 GIVE WAY 路牌前要你讓路……巨大化動物的創作意念不算陌生，但 Maf Cheung 毛毛球與別不同之處在於幾乎清一色以本土場景作畫，涉獵題材遍及時事（南昌押清拆霓虹招牌）、節氣（5 月木棉花飄絮），既呈現對不同動物習性的入微觀察，亦流露她對這城的愛，「想講同動物共存、共生喺一個社區嘅奇妙關係」。

由去年 3 月受朋友的店貓啟發初試啼聲，Maf 至今已繪畫 60 多幅巨大化動物作品，創作過程卻並非單純把動物「放大」—例如今次為 《SEA OUR HOME 守護海洋・藝術家居展》創作，她事先做足香港海洋物種的資料搜集，從中挑選外表討喜又具代表性的動物，也有故事性的考慮，「起初諗住畫四方魚，最後揀咗『香港版 Nemo』（克氏雙鋸魚），雖然個樣感覺『大叔』啲（笑），但都覺得佢更代表香港；而海蛞蝓係我好推薦嘅物種，側邊有『孿孿』裙邊，游嗰陣好似海入面嘅龍。我自己就最鍾意水母，好想好似佢咁無憂無慮喺海入面漂浮⋯⋯」今次作品另一挑戰是如何凸顯香港地景，例如曾經有綠海龜上岸產卵的南丫島，背景繪畫也經過反覆勾勒。

每隻巨大化生物，都有一個小人兒在旁，可會是 Maf 的化身？「其實佢唔係一個固定嘅人，所以每次嘅髮色、衣着都好唔一樣，希望等大家都覺得，其實我都有可能遇見呢啲巨大化動物。」剛巧綠色和平義工暨資深潛水員 Timothy 帶領我們到西貢白沙灣進行水底考察期間，正好遇上 Maf 筆下 6 位動物主角之一—刺冠海膽！

不過，從天氣愈來愈熱、維港海傍垃圾漂浮等親身見證，她也感慨眼前環境並非理所當然存在，寄語珍惜當下美好，毋用日後懷念：「呢啲物種可能因為全球暖化、氣候轉變，或者起明日大嶼人工島等污染，令生態唔再適合佢哋居住—希望大家珍惜而家仍然算係擁有、珍惜呢一刻仲存在緊嘅嘢。」

Isaac Spellman 巫男：魔幻海灘眾生相 召喚降暑衝動

「由一張空白嘅 canvas ，創作到一幅作品出嚟，我覺得都算幾神奇。」Spellman 這名字，源自一套 Netflix 劇集《Chilling Adventures of Sabrina》的女巫家族，而巫男的藝術作品亦別具魔幻風格，包括今次為《SEA OUR HOME》展覽創作的《海洋大道 Ocean Boulevard》動畫，描繪人類在海邊活動的美好時光，日月朝暮之間加上藍綠色調，「因為展覽嗰陣差唔多係暑假最熱嘅時候，好想啲人一見到幅畫，會有一種好有衝動去海灘降暑嘅感覺。」

海洋之於巫男，彷彿自帶一種使人舒暢的魔法：小時候享受「一支公」游出浮台，感受遠離繁囂的恬靜時刻，長大後則鍾情浮潛與水肺潛水，今次把創作目光移至岸上，也將自己融入動畫中的弄潮兒眾生相，「小朋友係代表以前我好鍾意砌城堡同執貝殼；沙排係因為我以前中學都有打排球；滑浪板就係寄語未來嘅我，因為我一直都好想學滑浪。」

巫男一方面期盼鼓勵觀眾用心發掘，香港也有美麗海洋，也不忘分享一次不快經歷，「記得細個有次去游水，突然隻腳有啲類似膠嘅嘢，一開始以為係被水母纏住，點知上岸先發覺係一大舊膠袋。」守護海洋沒有華麗魔法，唯有靠每一個人做好本份，「平時去玩，盡量記得要為海洋出一分力，就算玩得開心都要拎走啲垃圾。呢啲『俗套』嘅嘢，都要擺喺心裡面。」

Rolland Cheung：樹脂化作海岸線 與自然無形連接

樹脂（resin）非「樹枝」，原先是一種工業用膠水，因其獨特的流質狀態、凝固後帶有玻璃及瓷器的感覺而受藝術家喜愛，近年被用於創作物料。而在 Rolland 的樹脂藝術創作裡，海浪也非海浪，「我純粹畫緊好抽象嘅方向、力度、構圖、佈局，好 open 大家睇到乜嘢」。在玄妙虛實之間，這位香港首個樹脂畫藝術品牌 agape design ltd. 創辦人相信，觀眾來到 《SEA OUR HOME》 展覽欣賞其創作，自然有所感應：「希望作品同佢喺大自然嘅回憶緊扣，產生到一啲對話、反應，令佢喺呢個展覽記住某啲嘢。」

雖說感覺先行，也非憑空想像，Rolland 參照綠色和平 2017 年走訪香港十大被塑膠污染的美麗海岸，從中挑選了燈洲為創作藍本，「燈洲除咗島嶼嘅形狀最吸引到我，由疫情前所謂『無人島』演變成好多人去，都係一個我覺得好得意嘅地方。」結合向來是他靈感泉源的海岸線，由此誕生今次作品，「行山時望番落去海岸線，會發現原來唔只得藍色，亦有光線、折射，海床下同岩石之間都有好多事情發生。」

Rolland 與香港海洋最緊密的連繫，來自小時候跟隨爸爸划獨木舟，坦言以往不時見到海星，此情此景或難復再，但他仍然相信大自然豐富的生命力，只要用心感受，便能領會到一種仿如逛博物館時自覺放輕腳步的共存規律。「大自然本身就係一個巨大嘅創作，人都係基於呢個作品先再創造啲嘢出嚟。」

簡單登記 領取展覽限定海洋明信片！

現只需完成簡單登記，你便可於 7 月 1 至 16 日《SEA OUR HOME 守護海洋・藝術家居展》期間，親臨中環 PMQ 元創方會場免費領取一組 4 張本地插畫及海洋主題明信片，齊來關注、守護這片孕育豐富生命的海洋。立即按此登記及了解更多展覽詳情！