與談善言聽見海：讓電影提醒我們珍惜幻變海洋

她是《虎毒不》的新手媽媽淑貞，是《打天下》的倔強選手莊惠，也是《點五步》的溫婉少女芷菁——談善言（阿談）演員形象百變，想不到「多變」既是她給大海的形容詞：時而享受，時而恐懼，連憧憬的海洋生物也是百足咁多爪的擬態章魚（mimic octopus）？

「因為演員嚟㗎嘛！（笑）睇過條片，有條章魚係咁變嚟變去，扮石頭又扮沙，柔軟得嚟又百足咁多爪，好似水咁融會所有嘢，我就覺得好想係佢。」

在幻變之中，阿談不忘傾聽大海的聲音，最近便成為綠色和平「聽見海電影節」大使，並於 6 月 8 日世界海洋日出席電影節開幕禮暨綠色和平聯合出品電影《SEAGNAL》香港首映禮，鼓勵觀眾入場觀賞四齣綠色和平精選海洋紀錄片，因了解而感動，因感動而行動。

滑水學自我調整

看阿談的社交媒體，不難發現她是個愛海之人，工作、旅行照偶見大海蹤影，更多是分享 wakesurf （無繩滑水）經歷。「我特別鍾意望住個天好闊，就算跌咗落海、攤喺塊板度飄浮，望住個海都好。」而 wakesurf 教曉她的，還有處之泰然，「如果好大浪或者有暗湧，動作會變相難好多。但呢種『多變』冇話係正面定負面，要學習因應環境去適應，感受自己去調整」。

對不同水上活動的熱愛，帶她看過泰國 Krabi 如游泳池清澈見底的海洋，也看過相對混濁、朦朧的水世界，「其實都幾大嘅一個對比，希望之後會見到更多海洋都係咁清晰、咁靚」。

習慣了海洋存在

說回電影本業，問阿談心目中有否拍攝海洋主題電影的理想角色，「諗過做潛水員，但長時間戴住面鏡，做唔到戲同表情！（笑）」退而求其次，她想到滑浪同樣倚靠海浪，不失與海洋的緊密接觸。換成觀眾角度，鍾情的戲路就相當廣闊，有講述獵殺海豚的經典紀錄片，亦有以雞泡魚視角看海洋的趣味之作，「佢用另一個視角去觀察珊瑚礁，我哋睇唔到、太細嘅嘢，喺佢眼中就好大，哇突然間變咗怪物咁」。

歸根究柢，帶領觀眾走入銀幕、跳出日常，就是電影的意義。「海洋就好似父母咁，由我哋一出生就已經喺度；慣咗佢嘅存在，未必咁識得留意、珍惜佢。『聽見海電影節』放映多齣關於海洋或海洋守護者嘅紀錄片，可以提醒返我哋原來對海洋造咗啲咩傷害，又應該點樣對待佢。」

撐重用杯有得揀

開幕禮前，阿談應邀到百老匯電影中心小食部，成為綠色和平「愛海洋・有借有還爆谷杯」計劃首批顧客——「聽見海電影節」（即日起至 2025 年 7 月 13 日）期間，影迷可於小食部選購以重用杯盛載的迷你版爆谷，使用後將重用杯歸還至小食部，一嘗「重用代替即棄」、零廢觀賞電影的滋味。

自言睇戲時愛吃爆谷的阿談，實測時十分雀躍，並對計劃是否長期措施、現時有否院線正在推行甚感興趣，「我諗同你喺一間餐廳唔會用外賣杯一樣，（重用杯）可以歸還，就大大減少浪費。」以至在開幕禮及社交媒體亦連番鼓勵影迷一齊試，「觀眾 share 呢個訊息、好撐呢件事，係可以令佢繼續發生，希望大家都支持」。

聽見海電影節 四齣精選海洋紀錄片放送！

綠色和平於 6 月 8 日至 7 月 13 日期間舉辦「聽見海電影節」，精選四齣海洋主題紀錄片：《SEAGNAL》（大海的信號）、《水路阿朱媽》、《印尼式走塑》及《深海啟示錄》，於油麻地百老匯電影中心放映八場，其中兩場更設有映後談——嘉賓即將公佈，敬請留意綠色和平通訊！

除了親臨油麻地百老匯電影中心票房、自動售票機或網上購票，觀賞「聽見海電影節」精選海洋紀錄片，您的直接捐款亦能支持綠色和平攜手推動各國政府儘快落實具約束力的《全球海洋公約》，邁向 2030 年成立最少 30% 海洋保護區的目標，適當保障公海免受捕魚、採礦、鑽油等破壞性工業活動影響，讓海洋恢復生機！