「阿妹」有個環保紀錄片夢 岑樂怡：愛香港所以想佢好
鏡頭前的「阿妹」岑樂怡爽朗愛笑，尤其在個人 YouTube 頻道《岑樂怡和你Green》總是元氣滿滿，暢談環保大小事，因此聽她慨嘆「有啲灰心㗎，覺得香港嘅環保好似比五年前仲行得後咗」，還引用差利卓別靈「愈悲劇就係愈好笑」之說，份外體會到那種笑中有淚的糾結。
正能、負能也好，最緊要有種信念在你心——演藝事業踏上新里程，阿妹隨心而行也不忘環保，認真考慮自編自導一套香港環保紀錄片，並在綠色和平「聽見海電影節」映後談與觀眾約定再見：「其實喺我哋香港，有好多好叻嘅環保達人，係好值得畀世界知道。我好希望有一日可以有一套電影，約番大家喺同一個地方度睇。」
文章目錄
盼尋出路打破同溫層
「聽見海電影節」映後談當日，問及對剛才放映的綠色和平聯合製作紀錄片《SEAGNAL》（大海的信號）有何深刻印象，讓阿妹念念不忘，是講述一批墨西哥漁民堅拒以破壞漁法捕撈石首魚，從而避免誤傷瀕危加灣鼠海豚的章節中，那個一閃而過的香港，「因為我一路等緊，會唔會有香港嘅環保人士出場，結果有提到香港，但係講香港仲有好多對（石首魚）花膠嘅需求，令一啲唔好嘅捕撈作業出現。」
數香港大自然「主演」的作品，她想起睇到爆喊的《香港四徑大步走》，「啲山脈又靚，海洋又靚，其實好少可一粒點嘅地方有咁多山喎，香港真係好靚」。但説到執導紀錄片的構思，也有部份源自偶爾來襲的無力感——自小受媽咪薰陶養成環保習慣，2020 年疫情期間曾困於隔離酒店，隨手拍片介紹身邊唯一書本《戒除塑膠的健康生活指南》，自此便經營《岑樂怡和你Green》 YouTube 頻道，五年獲逾 15,000 人訂閱，還曾收到「原來 follow 我係為咗睇環保」的私訊、留言，鼓舞之餘卻也不禁思考，如何進一步打破同溫層。
「我哋圍內會做環保嘅，必定會繼續做、盡力做，唔會放棄。但確實有一班人，唔去掂就係唔去掂。」部份企業流於標榜「漂綠」，缺乏相應政策配合，環保仍被標籤為麻煩、固執，阿妹愈加有感一人之力難以改變，能夠堅持的是繼續諗計度橋：「可能拍紀錄片係一個出路……認真嘅，應該要有一套電影或者紀錄片，係屬於香港環保。」
人類學領悟感恩大自然
講到思考，不得不提阿妹去年完成一個「暫時為自己做過最滿意的決定」：人類學碩士畢業。「人類學就係，所有嘢都關人事。」與人有關，自然與環境息息相關。例如她的其中一位教授張展鴻（Sidney），正是綠色和平 6 月與中大人類學系、酒店及旅遊管理學院合辦「山雨欲來：生態旅遊民間論壇」的演講嘉賓之一，而阿妹亦有捧場收聽。「我喺佢身上學咗好多嘢，例如生態旅遊點樣帶嚟經濟收益之餘，同時間又唔影響當地居民或者環境。」
除了實用知識，人類學也教她返璞歸真的道理——向神佛祈求風調雨順、五穀豐登，傳統民俗看似迷信，卻蘊含一種在流水生產、機器收割等加速時代漸被遺忘的價值，「因為現代所有嘢都係快，你就錯過咗好多過程，但嗰啲過程其實需要等待，而等待本身就係美麗。」
就像電影《SEAGNAL》另一故事：韓國濟州島海女 Youjung 視海為家，曾被廢棄鬼網纏腳，又嘗與斷尾海豚同游，採摘鮑魚、海螺亦求取之有道。阿妹深深感受到 Youjung 對海洋的愛與依靠，亦盼往後透過拍片等方式，把訊息傳達更多人。「我哋喺大自然攞到好多資源，但同時間都要感恩、回饋，唔係就會好快耗盡佢。」
環保 crew、淨灘聚願望成真
關於紀錄片大計，阿妹不忘「戴頭盔」，「我唔敢講咁大，但係諗吓先啦，諗諗吓就真㗎啦」，而她今年確實有兩個關乎環保的心願成真。先是年初為電視劇《弊傢伙，我要去祓魔》拍攝主題曲 MV 時，獲監製戚家基首肯下擔當「一日劇務」，從預備容器、訂午餐、物流安排，到提醒眾人自備餐具及水樽一腳踢，順利完成 20 人「環保 crew」，節省最少 140 件即棄塑膠！
阿妹坦言明白拍戲「樣樣都係錢」，即使荷里活等海外影視製作陸續引入「sustainability team」概念，由專責團隊減少拍攝過程的環境影響，但香港隨着垃圾徵費擱置，更缺經濟誘因跟隨。猶幸演藝圈尚有很多有心人，在各自崗位盡做：「呢個圈其實唔只我一個『環保 L』，有啲製片都係好環保。佢哋有時都會約我出嚟傾吓偈，睇吓點樣去行。」
另一成就解鎖，就是 6 月與同樣熱愛海洋的好友余曉彤（Hidy）重組《祓魔》兩母女，率領 80 位粉絲前往石澳淨灘。阿妹形容自己一直希望善用後援會力量做有意義的事，就算今次挑選的淨灘地點屬於入門級，沙灘、石隙間仍遍佈難以執拾的發泡膠粒，最終合共清理逾 20 袋海洋垃圾，並如「佈道會」一樣圍圈交流，「問佢哋『有咩感受呀？』，個個都分享肺腑之言㗎喎，原來平時食飯個膠盒，真係會落咗海洋……我就覺得呢件事好好呀，同我嘅初心好近。」
在這個年頭談初心，「老土」但真摯——正如訪問結尾問阿妹，可有一句堅持環保的座右銘，「好老土㗎，因為鍾意呢個地方，因為愛香港呢個地方，愛大自然囉，想佢好。」