自創無塑商機，5個香港人的走塑故事
綠色和平自2018年起推動「全城走塑」，一直努力壯大「無塑」的想像和版圖。2021年綠色和平「走塑社區團隊」再起動，在此分享5個走塑店主的無塑可能，感謝所有店主相信並實踐「有你有可能」的精神，期望全城走塑商鋪突破1,100家，為本城更壯闊的「走塑社區」加油！
綠色和平自2018年起推動「全城走塑」，發掘社會多方的無塑可能，對象包括快餐及超市連鎖企業，幾年走來，我們建立「走塑社區團隊」走進社區，招募食肆和商鋪成為走塑同路人，一直努力壯大「無塑」的想像和版圖。2021年綠色和平「走塑社區團隊」再起動，目標是感染更多社區持份者加入走塑行列，期望全城走塑商鋪突破1,100家！
走塑地圖上目前已經有750多家商戶，感謝所有店主相信並實踐「有你有可能」的精神。綠色和平最近找來5位店主分享他們精彩的「無塑」生意經，讓我們為他們強大的守護環境地球意志喝彩，為本城更壯闊的「走塑社區」加油！
文章目錄
網購前行者：回收、重用包裝物
阿光2019年10月開創網購平台「瓹窿瓹罅」，首要堅持是環保原則。由開店第3個月開始就回收包裝物，重用紙箱和泡泡紙送貨。經營下來，打破網購催生無謂包裝的慣例，成功爭取司機、員工、以至客人支持環保網購。
客人購物滿一定金額，可獲上門回收的服務，令網店需要的空間愈來愈大，要三度搬倉，由600呎搬到近2,000呎。一切源於阿光與太太愛好潛水，眼見海中的魚吃著海洋垃圾，「就覺得我一個人做到嘅嘢太少，想做啲感動到人、教育到人嘅嘢」。兩口子善用社交媒體，教客人如何做好回收，每兩個月由網友投票挑選出「回收模範生」，得到最多「like」的客人可獲贈禮物。「有時我做得唔啱，佢哋都會提返我，我哋就可以一齊進步」。
疫情之下，大家頭號關注衞生問題。曾有客人要求用全新的泡泡紙和紙箱運貨，遭阿光斷然拒絕：「疫情係人類困難，但地球都面對緊困難，唔應該為人類方便，而要地球還呢個債。」阿光堅持與員工落手落腳為所有重用品徹底清潔消毒。
說到環保，「你食完飯都一定會洗碗，其實都係習慣嚟，希望環保可以融入到你嘅生活」，阿光希望與香港人一起養成環保習慣，填補生活中的縫隙。
裸買店女力，進擊「裸買聯盟」
祼買店「Seed點籽」位於西貢，售賣食品雜貨、環保用品、護理及保養品，貨品謝絕包裝，實現走塑之餘，減少浪費。無論是食品還是清潔劑，客人均需自備容器購買。貨品摒棄包裝，客人就可隨自己所需份量購買。主意源於Nicole：「以前自己一個住，買成包意粉但食得少少，擺到發晒霉唔食得。而家想食一餐通粉，$6買200克就搞掂。」一人之境，都可是環保天地。
4位女店主原是上班族，Nicole和Yan從事媒體工作，另外兩位拍檔做市場推廣。最先提出開店的是Nicole，因為不想人生「只係得返工放工」，毅然「裸辭」，開店重新尋找自己，繼而夥拍3位同路人。
開業2年，Yan看到大眾對環保觀念的轉變，客人「由當初『吓，無膠袋㗎？』去到『呀唔好意思，我唔記得帶』，個意念已經多咗人知道」。這就是經營裸買店的意義，「我哋一直講緊嘅都係，我哋究竟係咪可以做啲嘢去改變」。
店中寫的一句座右銘「每人一小步，地球一大步」。Nicole分享說：「我聽過一個朋友講，我哋唔需要10個人完美地環保，只需要10萬個人唔完美咁環保」對她們而言，開店的一小步已達成，下一步是⋯⋯ Nicole早前與有意開裸買店的朋友交流，近日在九龍灣、愉景灣陸續有裸買店出現，希望組成「裸買聯盟」，「區區有裸買」！
咖啡店店主，走塑理念溫暖社區
今天「Sp.Ace Cafe and Kitchen」將走塑文化扎根牛頭角社區，全靠3年來，店主Yvonne不斷從自己的小宇宙，輸送出無窮的環保愛心和力量。
早在走塑風氣未盛行前，就決定全店走塑膠飲管，客人有需要，店員會提供不鏽鋼飲管，誰料不鏽鋼飲管衞生問題成為焦點，小店於是更賣力，講解清潔和使用的程序，今天客人對不鏽鋼飲管零疑問。
餐廳有「租借餐盒」服務，可以50元按金租借餐盒外賣，而客人自備餐盒，更可享每個餐減3元的折扣優惠，「試過一日都有10幾個人有自備餐盒」，當中以熟客仔居多，「都係因為信任我哋，覺得我哋嘢食好嘅、衞生嘅」。
咖啡店有生產秘製醬汁，使用的都是徵集回來的盛器，全因Yvonne心存環保，店鋪不單努力走塑，還要盡量減廢，於是網上發文，收集各家各戶棄置的玻璃樽，至今已收集到逾300個，「而家大家都仲會keep住拎嚟，推出秘製醬汁至今都冇買過一個新嘅玻璃樽」。
談及小店的優勢，Yvonne就指：「彈性啲，我鍾意點做就點做，唔需要跟大規則，做得唔好隨時改」。她亦分享自己的環保初心：「堅持係自己畀自己，堅持到最後希望更加多人一齊堅持」；「客人覺得受影響，然後影響身邊人，一個人影響兩個人，就會發現一人之力可以好多」。
小店堅廚媽 拒用膠救地球
「我話過，我做食嘅話，一嚿膠我都盡量唔用」。「小廚美食」的「小廚媽」，在荃灣開店，主打港式小食，舖面小小（不足100呎），但環保意志很大；即使成本較高，仍然堅持要購入價錢較貴的外賣碗，只因地球健康比個人利益更重要。
小廚媽用紙製碗碟，價錢比一般餐廳用的塑膠餐具貴達一倍，她更租用了小店旁邊的閒置舖位做倉庫，方便入大量碗碟，不怕蝕本嗎？「無計呢啲㗎喇！」小廚媽揮一揮手，賺錢就她而言不是唯一目標。
小厨媽提到堆填區全部都係膠的驚嚇畫面：「唔好話幫唔幫到個地球，你見到每日都有咁多垃圾，全部燒唔到、熔唔到」。她指環保注入生活，沒有後退的餘地，「做開就返唔到轉頭，個心會不停諗住要環保」。
慳得一件得一件，「有啲客明明喺度食埋，又唔同我講，搞到我用膠袋包好，先知原來佢喺度食」，她不會輕鬆「放生」這個膠袋，「我會鬧啲客叫佢畀返個膠袋我，起碼少一件落堆填區」。
上一代的觀念叫慳儉，小廚媽坦言環保習慣承襲自媽媽，而她也將環保概念傳承予女兒，20多歲的女兒亦學到了媽媽的堅定，「佢仲嚴過我，喺公司導人環保，唔畀用即棄餐具」。
「做到幾多就幾多，總之唔好理成果，每個人做少少已經爭好遠，我個心態就係咁」。
飲食業鉅子 由「小鬥士」到環保「大作戰」
飲食集團敍福樓的主席黃傑龍，旗下擁有38家食肆。其集團早年已經推出無翅婚宴、照明採用LED燈等。「相比飲食業嘅同業嚟講，可能我會相對留意啲環境議題，有啲同業叫我『環保小鬥士』！」從商13年，他說著臉上有種自豪。原來黃畢業於土木工程系，當中有修讀環境保護課程，環保種子大概從此種下。
黃身邊且有另一位「小鬥士」，他的女兒：「我個女而家唔畀我用任何膠樽」，父女同心環保作戰，源於一次清潔沙灘活動。小女兒拾到大袋廢物中，大部份是膠樽、飲管，上網再看到海鳥解剖相片，胃部全部是塑膠垃圾，「嗰刻我打從心底想做啲嘢」。
於是，去年年初推出「飲管加$2」新規定，不過惹來客人怨言，「你環保你嘅事，做乜要我畀錢呀？」謾駡聲中，黃搜羅替代品但發覺成本不菲；他冷靜思考，飲管不是必須品，肯定初衷無誤，遂堅持減飲管，為穩定軍心，他向員工展示海龜孔插飲管的影片，令他們明白環保緣由。去年5月改進推出「走飲管飲品減$10」措施，客人反應正面，同業讚嘆他確為「小鬥士」，餐廳至今已省下40萬支飲管。
疫情下，他亦推出「外賣自取體驗」，以堂食器皿盛載食物，由客人親自放進自攜飯盒，更提供折扣優惠。「我哋做大眾化生意，可能未必做到好徹底，但只要搵到啲嘢做，個影響會係比較大，呢個係大集團嘅責任」。
「一定要考慮可持續發展，做到生意亦要地球捱得住，最緊要搵到雙贏！」黃傑龍樂見其他大集團亦重視社會責任，陸續加入「環保大軍」。
全城走塑，有你有可能
世界很膠，環境很危險，這5位香港生意人將個人信念，放諸他們的商鋪、企業，行動不止帶來正面改變，並且發揮凝聚力、感染力，帶動社區發揮更大的走塑影響力，讓全城大步朝著無塑目標邁進，你願意向身邊人和社區大聲問句：今日走咗塑未？
