山野中不能承受的膠 林婷守護環境輕與重

看《變形記》主角一覺醒來變身龐然古怪的蟲，我們作為讀者，懂得這叫荒謬。但置身於現實的荒誕，環境變壞，安枕不易，無憂更難，偶爾還是會感到無力。同樣的故事情節，背景換到山野之中，藝人林婷與綠色和平合作拍攝走塑微電影《山野中不能承受的膠》：如果有天睡醒你變成牛牛躺在塑膠堆中，或許你會更願意踏出守護自然的第一步。

面對那些不能承受的或輕或重，寧可相信選擇而非命定，轉個想法總能迎來改變。「同一條路，轉一個行法，守護方法有千萬種」，故事是這樣展開。

輕率丟棄 重擔隨身

動物與小孩，一般統稱為拍攝兩大難題。林婷今次與製作團隊於馬鞍山取景一整日，試過誤遭牛牛「屙尿」濺中，特寫鏡頭也要耐心守候，「佢哋想過嚟就過嚟，唔會夾硬引入鏡。大自然係屬於大家，要互相尊重。」恰巧因為等待，讓她近距離目睹獨一無二的美景背後，牛牛如何翻開膠袋，埋頭覓食。

馬騮、野豬伴着垃圾桶開餐，郊野草坪漸變光禿貧瘠，再非突發新聞，習以為常之輕，卻使我們忘了問題之重。即使林婷愛好假日行山，不時見到餐具、水樽、口罩、膠袋等垃圾遺留山野，也會被錯覺蒙蔽：「之前去露營，野豬食晒枱面啲嘢食，當時冇諗佢哋識唔識得叼啲嘢食，定將所有垃圾食晒。今次拍完再睇片，先發現佢哋真係唔識分。」

根據漁護署數字，2020年到訪香港郊野公園的遊客突破1,200萬人次，同年全港郊野收集垃圾總量達2,316公噸，重量超過150架雙層巴士。然而山上垃圾桶容量有限，一種「會有清潔工人執」的想法，反令不少人捨棄舉手之勞，自己垃圾自己帶走，度假天堂淪為塑膠天堂，「等於你喺屋企，有垃圾都會清去垃圾房，點解你上山唔可以咁做？」

「因為見唔到之後發生嘅事：我相信如果睇到牛食咗口罩、垃圾，就唔會再想咁做。」

輕視危機 重拾選擇

所以林婷主演的另一場景，就是從噩夢驚醒變成躺在塑膠堆中的牛牛：充饑僅靠塑膠三文治、解渴水源卻有微膠粒漂浮，也為此獻出「食膠」第一次。感覺如何？「冇味，硬囉。」

野生動物被迫「硬食」塑膠污染，其實人類也未必如我們想像般自由選擇──綠色和平早前發表全港首個郊野溪流微塑膠調查，就發現8個郊野溪流水樣本當中，半數含有微塑膠。即使如林婷一樣努力走塑，有時也不免無奈：「我有一日試過自己係咪好多塑膠，發現想煮一餐飯，去超市買嘢，水果、凍肉又好，全部都用膠。」

「我哋市民冇得揀，但企業有得揀。只要佢哋肯做，我哋減少購買即棄塑膠，垃圾都自然少咗。」

輕鬆走塑 重大改變

「微塑膠就算肉眼睇唔到，最終都會流返入大海食物鏈，好似貝殼類同生蠔咁，最後都係我哋承受番。」林婷一副專家口吻細數微塑膠遺害，部份知識源自早前主持環保節目，也從當中一個走塑小實驗悟出大道理，「試過帶餐盒去茶餐廳，問可唔可以唔用發泡膠，其實普遍都好樂意。有啲嘢唔淨係市民責任，無可避免要政府、企業一齊做，因為呢個社會、大自然係大家嘅」。

影片以「每一片土地，都係獨一無二，所以更加唔可以放棄佢」作結語，而她亦在生活中繼續堅持，除了由日常自備餐具等輕鬆小事做起，也鼓勵大家加入企業走塑聯署，凝聚力量，推動改變。「只要你養成習慣，身邊人睇到，知道係好事，就會當你係榜樣去學習。」

「改變自己之餘，都可以改變身邊人。我哋一齊合作去完成呢件事！」