兩餸飯老闆支持自攜、借還飯盒：香港人撐得起環保
講起疫情以來生意急升的兩餸飯，焦點大多落在平民價錢與菜式推介，在討論區搜尋「兩餸飯 環保」，只有零星帖文關注。畢竟發泡膠飯盒迅速送出，即棄塑膠餐具乾手淨腳……
原來「矛盾只因深愛着」──在新蒲崗一間雙餸飯店，老闆除了樂意為自備餐盒的顧客舀餸裝飯，也多花心思盡量節省即棄餐具，甚至表態參與在外地發展愈趨成熟的重用器皿借還服務，既有對破壞地球環境的懺悔，亦相信香港人願以良心消費撐起環保理念：「香港人都好『國際』，喺其他地方見到人哋咁環保，將啲諗法帶番嚟：我哋都可以好環保！」
文章目錄
收自帶盒已熟手 問多句盡慳餐具
疫下百業蕭條，平價兩餸飯應運而生，Jeffrey 的小店去年 2 月開業，提供實惠「醫肚」選擇，只做外賣生意卻少不免「派膠」，每當談到環保議題，總會露出靦腆笑容。「其實唔係幾開心㗎，因為我都有份破壞緊環境……我係製造垃圾者，但又講緊減廢，係有啲『兩面不是人』。」
曾有那麼一句話，「愛的相反不是恨，而是冷漠」，污染者大可心安理得；若然心有不甘，仍有盡做空間嗎？坊間有店鋪以疫情為由停收自備容器，Jeffrey 則相當歡迎，只見他面對形狀百變的玻璃盒甚至摺叠式食物盒均來者不拒，平均每日也有約 10 位顧客自帶飯盒。「其實唔會麻煩，熟咗手每樣嘢跟足份量就得，最緊要客人鍾意。」
另一減廢細節，就是「解放」原來綑綁即棄刀叉羹、紙巾、牙籤在一起的餐具套裝，再多問一句「要唔要筷子、匙羹」，而非流水作業式放進膠袋，總算減緩對環境的傷害。
撐重用系統免卻麻煩 「我真係願意試」
盡做本份之餘，經營加盟店的 Jeffrey 早前亦向總公司建議推出可重用飯盒，便利顧客放入微波爐翻熱，避免釋出有毒物質，下次買飯亦可帶回店鋪再用，「一來保護環境，二來對你自己健康都有幫助，大家 win-win。」
當然，你我家中廚房理應不乏重用器皿，「怕麻煩」才是自備容器一大障礙。綠色和平早前發佈的民意調查，就發現相比回收或自備，市民普遍對新興的可重用器皿借還服務的看法更為正面[1]；去年 7 月推出、目前踏入第二階段的「綠色和平重用杯借還計劃」，亦會繼續改良、研發適合香港的重用系統。Jeffrey 聽過計劃簡介後亦表示「出街唔使帶住個飯壺，仲有個乾淨啲（嘅容器），大家咪冇咗個擔憂……香港人只要你唔煩到佢，佢係會環保㗎！」
就算要在小店騰出空間擺放幾十個飯盒、幫手清洗乾淨都願意？答案來得斬釘截鐵：「我願意諗！講真，我真係願意諗。」
相信消費者 選擇「同路人」店鋪
訪問當日，加快管制即棄塑膠餐具仍只聞樓梯響，「我會覺得煩，但都會支持。2025 年先做係遲㗎，3 年可以生產好多廢物。」直至去年 11 月，經綠色和平等環保團體倡議、結合超過 5,300 位市民表達意見，政府終宣佈計劃提前於 2023 年實施首階段管制，可會推動每日派發即棄餐具不計其數的大財團更注重環保？
「佢哋影響到工廠生產咩產品畀市場用，幻想吓所有工廠都造環保嘢……」連發泡膠飯盒成本亦跟隨石油原材料價格上升，說到政經關係，小店彷彿總是「肉隨砧板上」，但 Jeffrey 相信有種力量，叫做「以消費為想要的世界投票」。
「我哋力量唔夠大，但可以灌輸理念畀客人睇：我哋支持環保，你哋可以自己帶飯盒。長期我身為一個支持環保嘅人，會選擇理念相同嘅食店，繼而影響其他店鋪。」
「想幫個地球，就去支持自帶飯盒嘅地方消費，再引導身邊人做同樣嘅事，一個傳一個。」