每天叫醒我的是環保 大便妹有一個夢：淨灘，直到不用淨灘那天
在效率至上的香港講環保，本質彷彿自相矛盾，以致環保人士身上多少帶點標籤— 要麼苛刻如「環保L」、要麼神聖如西西弗斯。像環境教育工作者大便妹過去兩年半堅持每周淨灘，有人說她傻，有人說她偉大，但讀過其新書《生活給我們上的 10 堂環保課–我就是要環保過生活》，你可能體會到，夢想可以簡單如：我就是要環保過生活！想要溫柔一點活在地球裡……
「淨灘，直到不用淨灘那天──佢係一個願望，同埋一句表達自己堅持嘅說話。」
文章目錄
源頭減廢：最有效淨灘方法
7 月一個晴空萬里的中午，大便妹與十多位「淨灘瘋人院」伙伴步往長洲東灣仔沙灘，冒着 35°C 酷熱天氣，兩小時清理逾 40 公斤垃圾，但原來論數量只是小巫見大巫，「有次試過執咗百幾公斤垃圾、超過 1,400 個膠樽。我哋叫做打咗一次『大佬』，好有滿足感」。
旁人眼中的苦差，大伙兒卻樂在其中，除了分享自備餐盒盛載的水果，在餐廳呷一口「走飲管」的凍檸茶、聽着海浪聲得到治癒、紓壓，成為他們堅持兩年半、逢周四遊走全港淨灘的動力。而這班"CraSea Cleanupper"另一獨特之處，在於每次淨灘完畢後的統計環節。
「膠樽蓋 30 個，飲管 20 支，釣魚用具+1……」只見眾人俐落分工：點算指定種類的家居垃圾，報數後用手機記錄，把完成盤點的垃圾妥善包好。矢志收集數據，是為了長遠建立一個「海廢資料庫」，以理據說服、教育更多人源頭減廢：「我哋過去兩年半發現，海洋垃圾第一名係膠樽，一年可以執到五萬個。有呢個數字，就講到要最實際應對嘅問題，可以飲少啲膠樽水，自己帶樽或者斟定水出門。」
延伸閱讀：【震撼視覺】海岸垃圾都有展覽？淨灘清不走的塑膠污染
「沙灘其實好真實反映我哋點樣對待環境，而淨灘係一個途徑，畀我哋睇到生活方式會唔會有問題、錯誤。當每個人都保證唔到自己扔嘅垃圾會落到堆填區，而且堆填、焚燒垃圾都唔係根本嘅解決方法，就會有動力去反思、改變──源頭減廢，就係最有效嘅淨灘方法。」
環保是持續進行的夢想
這股對環境教育的信念，也源於大便妹自身的環保啟蒙──學校小食部一個塞滿膠袋、膠叉、發泡膠碗、紙包飲品盒的垃圾桶，驅使她上網搜尋資料，發現堆填區原來有爆滿一日，「好似忽然間醒咗，覺得當時過緊嘅生活方式有啲問題」，亦感嘆即使一早從書本接觸全球暖化、冰川融化等宏觀議題，知識與生活之間卻缺少連繫，讓人明白支持環保其實是保護人類生存基本需求：潔淨的水源、空氣、食物、適宜居住的棲息地。
後來機緣巧合下到菲律賓當鯨鯊研究義工，見證瀕危鯨鯊在保育政策下仍無奈與大量海洋垃圾共游，遊客又彷彿一切如常地合照的詭異景象。「各國都有禁止貿易、捕捉鯨鯊嘅保育政策，但如果佢身處嘅環境唔健康，其實你係保護唔到佢。正如你有一個小朋友，就算對佢百般呵護，但原來呼吸緊嘅空氣有毒，都係畀唔到一個健康嘅環境。」
對於酷愛鯨鯊的她，能夠跟野生鯨鯊相遇堪稱圓夢，某種失落感卻油然而生。「人生有冇咩可以一直持續進行嘅夢想？支持環保冇完結一日，一路都好漫長，每一日都可以為呢件事努力。」於是確立了環境教育為人生方向，繼續走下去，「我嘅心願，係希望有一日海邊會冇晒垃圾」。
每日比昨日環保少少
14 年環保生活點滴，既讓她煉成了「我就是要環保過生活」的倔強，同時不忘體諒他人、求同存異的溫柔。在台灣升學時見證當地不如想像中環保，想分享卻又有點難為情，不想為朋友徒添壓力，於是開設了「大便妹，學環保。」 Facebook 專頁，以鼓勵、得意手法分享一堂又一堂環保課，初衷至今依然未變。「唔環保係一個 normal，我細個都係超唔環保，但會選擇過環保生活，就係因為睇到需要改變。呢個改變嘅過程唔係要畀咩壓力，而係希望大家睇到有唔一樣嘅生活方式。」
View this post on Instagram
從大便妹口中「一大段無聊文字」分享走一支飲管的生活札記，到最近哀悼西貢布氏鯨撫慰人心的插畫，或許更能與讀者互勉、共鳴。她亦期望藉着今次分享會，與參加者一起學習與大自然溫柔共存。
「首先喺心目中認同環保重要，再搵到自己舒適嘅方式去實踐，慢慢一步一步嘗試，每一日都可以比昨日環保少少，咁樣每個人都可以過得好環保。」
後記：訪問當日其中一條「你理想嘅世界係點？」未及發問，後來大便妹在 IG Story 親自解答，謹此摘錄：「我理想的世界有好多好多愛，我們以愛為根據待人接物……當然愛從來都不是無限的，沒有人可以無限地愛，但每個人都可以學習更無私地愛。」