【重用杯專訪】因親近而珍惜 坪洲「咖啡佬」的環保進化史

【綠色和平重用杯借還計劃│參與咖啡店專訪】上網搜尋「墨麒麟」店主阿逸的故事，「騎住鳳凰沖咖啡」的名號躍現眼前──當年騎着單車為島民沖泡咖啡，如今從坪洲到中環、從鳳凰到麒麟，單車沒有變摩托，卻以啡會友變出一間朝啡夕酒的店鋪。心境有所進化，但那股着重社區連結、與環境共生的情懷，依然濃稠如墨化不開。

「咖啡店每賺一蚊 都消耗緊地球資源」

「咖啡係一個媒介，我鍾意用咖啡去識唔同嘅人。」在行內，阿逸不只剛巧向好幾間「重用杯借還計劃」參與咖啡店供豆，最初得知計劃也是透過行家分享，「當時見過上環區（首階段計劃）嘅相關宣傳，其實一直都有興趣，因為最簡單一隻杯、一個蓋、一支飲管、一包咖啡豆包裝……呢個行業賺嘅每一蚊，某程度上都係消耗緊世界嘅一啲資源。而你哋有個系統喺度，覺得個效果會更大，就不如試吓。」

而在行外，阿逸由疫情初期「被辭職」開始，毅然於居住地坪洲把踩車生活與咖啡師專業連結，不諱言最初一心做自己，「想做就做」；小島之美、鄰里之情，卻逐漸滴注心頭。「你近得花草樹木多，變相其實會珍惜多咗。我由港島坐船返屋企，成個人會放慢落嚟，望多咗世界，而家行出街都會望多咗個天。」

盼連結社區 「行出第一步就會繼續用」

如今這架單車重回鬧市稍事泊岸，某種灑脫也許帶不走，隨身卻有對環境的善念，以及更想了解他人的好奇心，對如何以重用杯連結社區也有多一分思考，「現實係好多人淨係諗到自己嘅成本，唔肯付出一啲嘢去獲得更好嘅嘢……踏出第一步係困難，但肯踏出之後就會繼續去用。」

這頭鳳凰接下來繼續進化，新店即將進駐中環天星碼頭，再次與海為鄰，屆時重用杯借還計劃參與店鋪可能又多一間？「有興趣㗎！嗰度真係外賣店，用（即棄杯）嘅損耗可能大咗，但到時成件事會唔會反而更推廣到？有啲想法可以再推前啲。」

感謝各界關注及支持，綠色和平「重用杯借還計劃」現已擴展至全港更多地區，與 36 間咖啡店及連鎖咖啡店合作，並推出「借CUP重用 即給獎賞」推廣活動。

立即下載手機應用程式 #ch00ze，按指示每借用 1 次重用杯買飲品，即可儲 Beans（積分）換領獎賞！（按此瀏覽計劃詳情）

【綠色和平重用杯借還計劃│參與咖啡店系列專訪】
Coffee & Laundry：自比 Café 界林超英 潮人設計師品味、環保全都要
CLEAN：轉牛奶、即棄杯加 $2 西營盤小店 hardcore 中對話
Beyond Coffee & Bar：留下來的文藝咖啡店 人生下半場交織環保夢
Espresso Remedy/The Tiny Island/今半啡 Meanwhile/Cupping Room/Green Door/Knead：上環重用杯借還新嘗試 點解 6 間咖啡店肯支持？