最新消息

Homepage主頁

如何支持

專題報導 塑膠
4 mins

梁祖堯的走塑告白:香港人力量可以好大

作者: 綠色和平

舞台上演活過一個個幻夢,即使帷幕因疫情暫告落下,梁祖堯仍在努力實現他從書中看到的一件奢侈事情:「我還是覺得,自己能有一塊田真好。」他說香港人要食香港菜,而走塑就是一脈相承、自然而然的事:如果荒廢十載的農田也能再次煥發生機,那個集新鮮、美味、無塑於一身的永續願景也許會遲到,但絕不會缺席。

梁祖堯與綠色和平項目主任陳可淳示範母親節走塑大餐,分享每個食材背後的根源。© Greenpeace

梁祖堯與綠色和平項目主任陳可淳示範母親節走塑大餐,分享每個食材背後的根源。© Greenpeace

「小棠菜有少少窿喎,狗蝨仔食先,唔落藥就係咁!」
「香港種紫甘筍,基本上係冬天種,立夏已經係水尾…」

與梁祖堯訪問馬寶寶社區農墟,聽他跟檔主交換只有農人懂得的密語,一邊閒話家常,一邊掏出三個食物盒、一條大毛巾、一個環保袋。見他俐落地把蘑菇、紫甘筍、紅莧菜分門別類放進食物盒,再用大毛巾捲著節瓜、翠玉瓜等食材,然後放進環保袋,無塑購物大功告成。

「喺農墟,如果你好似我咁帶食物盒、袋,基本上可以一啲即棄塑膠都唔用,就買到需要嘅嘢 。(塑膠)對我哋消費者嚟講完全冇用,一拎返嚟就即刻扔,冇辦法重用,好可惜、好浪費。」

農墟覓知音:感受食材的觸動

曾經修畢法國烹飪藝術文憑,如今主持飲食節目,廚藝雖好還須新鮮食材扶持,而他買餸往往首選農墟,然後才是街市、超市。「最好嘅食材,你係可以摸上手、聞到味道、掂到質感。農墟嘅食材,新鮮到你有樣睇。」

自備食物盒到農墟選購新鮮本地菜,滿載而歸! © Greenpeace

自備食物盒到農墟選購新鮮本地菜,滿載而歸! © Greenpeace

食材以外,他更在乎人與人之間的交流──每位檔主、農夫,都是大隱於市的專家。「最最最最最開心嘅事係你可以同一班農夫交流,你可以問佢哋點樣食,點樣為之靚。就算係今晚定聽朝食嘅分別,佢都畀到資訊你。」

復耕荒廢農田 嘆塑膠垃圾塵封十年

無論月初為綠色和平示範母親節走塑大餐,或者早前接受傳媒訪問,梁祖堯有一句話總掛在嘴邊:「每食一條大陸菜,香港就會少一塊農地。」

「香港人食返香港菜」掀起一時熱話,但他喜歡耕種並非三分鐘熱度,「種植嘅興趣,喺我DNA裡面㗎啦。」婆婆是廚藝啟蒙,外公則播下務農種籽,從小時候看窗台綠豆萌芽,繼而化身城市農夫開墾天台園地,直至最近親身走上種田前線,投入一周耕種6日的全職農夫生活。

母親節走塑大餐食材全部不經塑膠包裝,大部份更是「本地薑」,輕鬆炮製色彩與味道的饗宴。 © Greenpeace

母親節走塑大餐食材全部不經塑膠包裝,大部份更是「本地薑」,輕鬆炮製色彩與味道的饗宴。 © Greenpeace

斬草、翻泥、流汗,田野恭迎新手農夫的見面禮,是塑膠垃圾散落四周。「你見到上面嗰啲包裝、印刷,已經至少10年前,然後原封不動係泥土裡面。扔垃圾嗰一刻好方便,亦可能冇諗咁多,就遺留喺泥土裡面10年。」

那是香港人的錯嗎?農田旁邊就是行山路線,他的觀察是膠樽回收箱往往逼爆,環保意識其實OK:「不如再行多步,帶水唔使買水,連膠樽都唔使用!唔製造就唔使諗點回收,源頭減廢。」

順藤摸瓜,他說一切在乎我們能否掌握自己的生活。

梁祖堯期望今年出書,繼續為推廣本地農業深耕細作。 © Greenpeace

梁祖堯期望今年出書,繼續為推廣本地農業深耕細作。 © Greenpeace

28蚊斤「貴價」本地菜 利多於弊

因為忙碌,所以怕麻煩,所以追求方便,或者千方百計嘗試彌補。「種同買嘅味道根本唔同,中間就係碳足印嘅代價。本來新鮮就會好味,好味點煮都好味,而家唯有用好多方法整到佢好味,或者用好多額外包裝去保鮮。」

得到了全天候食材供應、便宜至10蚊3斤的蔬果,但我們不知不覺失落了更多:簡單如鮮摘火箭菜因有芝麻濃香而稱為「芝麻菜」的霎時感動,或者不時不食的傳統智慧,甚至更寬廣的未來與環境。

全城走塑與香港人食香港菜,同樣為了一個更美好的香港。 © Greenpeace

全城走塑與香港人食香港菜,同樣為了一個更美好的香港。 © Greenpeace

「無論如何都唔會遲」

「環保生活,可能真係好唔方便,又要分類回收又要沖乾淨,紙包飲品盒又要剪同搣膠。但每一日開始都唔會太遲,地球就會少一堆廢物……無論如何都唔會遲。」

買餸時自備餸籃,帶意粉罐、保鮮盒幫襯走塑小店,實踐起來,原來沒有想像中困難:「如果你覺得麻煩,應該只係未試過,想像要拎好多盒;但其實用膠袋,返屋企都係要拆番晒,再放入保鮮盒擺落雪櫃。而且你要諗定買咩嘢,就唔會買冇用嘅嘢,仲可以慳錢,其實真係除笨有精。」

就正如推廣本地農業。早於疫症蔓延前,梁祖堯已決定今年努力分享田野驚為天人滋味;年初在農場開班製作蕎麥麵,收益全數支持本地農業,結果火速爆滿,讓他相信香港仍然是有種人。「香港人嘅力量可以好大,大家都知道,只要每個人今日開始去做少少,成個負擔已經可以輕好多,所以希望大家都可以開始啦。」

「煮嘢食係一種愛,你要愛埋其他人,先有心機煮畀佢哋食。而你亦要愛呢個地球,先可以得到最好味嘅食材。而愛地球最直接同食材有關嘅方法,就係減少即棄包裝。」

「同埋支持本地農業、有機種植,減少運輸過程嘅碳排放,對環境傷害最小,而且係可以永續耕種。咁我哋嘅子孫嘅子孫嘅子孫,都可以食到優質嘅本地菜。」