走塑共學堂第一課 教你改變社區4大心法
何謂「改變」何謂「社區」？似乎毋須多花唇舌解釋，但兩者加起來：改變社區……點做好？綠色和平早前舉行「綠色社區點做起？達人同你渾身解塑」網上共學教室，邀請祼買店「日常豊作」店主李秀平（Ann）及前大埔區議員連桷樟（Dalu），向超過100位學員傳授社區行動心得，揭開走塑共學堂序幕。一連四堂工作坊快將截止報名，你也來齊學齊試，建構理想中的走塑社區！
文章目錄
1 做個「環保社工」
「好多人入到嚟鋪頭，就會問你其實係咪社工？呢度係咪社企？我都好想製造到呢種氣氛，一齊傾下環保，做社工都幾好吖！」Ann鼓勵顧客自攜器皿，或勸說別到隔籬超市索取膠袋時，的確會苦口婆心說「乖啦」、「唔好啦」。她本來是個普通上班族，競選業委期間認識了一班環保街坊同路人，從共購有機菜及儲廚餘堆肥做起，終萌生開鋪念頭，至今已營運一年。
小店位處九龍灣屋苑商場一隅，卻扮演多功能角色：街坊的打躉吹水站，出讓或轉贈二手物品的中途點，還有年長居民眼中的「復古鋪頭」：「我會話祼買店就似以前士多咁，買酒就攞酒樽、買豉油就攞豉油樽。」
是否社工也好，她覺得一切在乎體諒都市人充滿各種生活顧慮：「如果冇welcome嘅態度，好難令平時冇諗過環保點做嘅人入嚟接觸、試下做少少改變。要畀人『進入』環保呢樣嘢，唔好覺得麻煩。」
2 一切源於想開心
這邊廂祼買店重拾士多意象，那邊廂連桷樟口中「邊有可能仲會喺20XX年見到」的社區風景，過去兩年不時在大埔復刻：中秋節大月亮、冬至天井聖誕掛飾、新年「推銀仔」攤檔等社區活動，教不少區外人羨慕不來。問到創作意念與緣起，他的答案卻只有一個：想開心。
「點樣為之開心嘅社區，就係人與人之間linkage埋一齊。我哋都聽過話以前點樣有人情味，但嚟到呢代人，覺得社區係冇我份。咁後生就唔會有人情味咩？唔係咁架嘛，即係啲嘢唔啱啲人參與。而家做到，咪會開心。」
連桷樟甚至覺得，有時毋須設想太多嚴肅的意義，例如大月亮純粹源自「可唔可以將個月亮帶落嚟？」只要有人就有八卦，有信任就有互相幫忙。「其實有好多人好八卦，自然會貢埋嚟問你做緊乜。佢嘅intention未必同你嘅設定一樣，但枕住每次嚟，慢慢有啲嘢會變得到。」
3 慢…慢…嚟…降低門檻
我們都知道，有些危機逼在眉睫；有些事情急不來，卻也是事實。連桷樟強調社區協調必須與不同持份者做足溝通，不能挾大家上馬。他又舉例指結合街坊專長、把知識應用於維修舊風扇、衣車到鋁窗手柄的「不是修理檔」，從中領悟到組織者需要給予時間，協助跨越由認知轉化行動的門檻。
「喺街坊心裡面，『唔想嘥嘢』嘅concept係大於對環境係咪友善。佢哋未必唔知環保嘅好，但要佢take action係有個高門檻，關鍵係點樣幫佢跨過，但起點係大家攞到共識。」
Ann也認為各種強迫與施壓，只會適得其反，反而着手提供簡易方法，連老公也是這樣開始走塑：「佢唔係好祼買嘅人，於是我每次都帶矽膠袋去買餸，慢慢潛移默化，喺屋企又擺得順手啲去攞。有次佢影張相畀我，係袋住肉嘅矽膠袋，好感動！」
4 落手做！
說了這麼多，連桷樟認為要推動改變，歸根究柢也是一個字：做。「落手做一次！講係講唔明人，惟有做出嚟先話到畀人知你做緊啲咩。」唔好驚衰、預咗辛苦，知易行難，但他始終覺得就像排完又排玩「扔彩虹」的小朋友，慢慢自發幫忙刮走銀仔甚至派發獎品，這種「自動波」模式更接近他心目中社區參與、互助的感覺：「佢哋都落手去做，先明白嗰種樂趣、快樂。而且用心去做，大家知架嘛！」
閱讀到此的你，可會心思思參與「走塑共學工作坊」？6月26日起一連四節實體課堂，將會帶你認識塑膠議題，繼而學習如何策劃、實踐走塑活動，最後一同設計小型社區項目！立即把握機會，於6月21日前報名參加，約定你一同爆發小宇宙！