Den Haag, 26 di yanüari 2026 – Korte di Den Haag lo duna su veredikto djárason 28 di yanüari pa 9 am den e Kaso di Klima di Boneiru, ku a ser entamá pa ocho habitante di Boneiru i Greenpeace Hulanda kontra Estado Hulandes. Korte lo dikta si Hulanda ta protehá su propio siudadanonan sufisientemente kontra e konsekuensianan di e krísis di klima. Boneiru ta konfrontando kalor ekstremo debí na kambio di klima, pero gobièrnu no ta bini ku medidanan di protekshon. E demandantenan i Greenpeace ta eksigí pa bini ku un plan konkreto i realisabel pa protehá Boneiru, i ku gobièrnu lo aselerá e redukshon di emishon di CO2 di Hulanda te na sero. “Lo ta un viktoria históriko si korte obligá Estado Hulandes pa tuma medidanan konkreto ku ta protehá hende kontra wer ekstremo i otro konsekuensianan di e krísis di klima,” asina Marieke Vellekoop, direktor di Greenpeace Hulanda a bisa.

Promé kaso den korte tokante adaptashon i alabes un testcase despues di verediktonan internashonal

Esaki ta e promé kaso na Europa kaminda un hues por dikta ku un pais mester desaroyá maneho di adaptashon ku ta protehá hende kontra kambio di klima. Antó e ta un di e promé kasonan di klima despues di e veredikto di Korte Europeo pa Derechonan Humano den e kaso di KlimaSeniorinnen i e resien konseho di Korte Internashonal di Hustisia na Den Haag. Den e último konseho ei, Korte a dikta ku estadonan mester tene kalentamentu di mundu bou di 1.5 grado Celsius, i ku nan plannan di klima mester demostrá ambishon máksimo, teniendo kuenta ku emishonnan históriko i nivel di prosperidat. Esaki ta nifiká ku paisnan manera Hulanda mester hasi mas. Pues e kaso akí ta e promé testcase grandi despues di e verediktonan pionero di kortenan internashonal i e por pone un presedente ku tin relevansia mundial.

Marieke Vellekoop, direktor di Greenpeace Hulanda: “E kaso di klima akí ta krusial. Na promé lugá pa e hendenan na Boneiru, pero tambe pa nos tur. Habitantenan di Boneiru ya kaba ta eksperensiá diariamente e konsekuensianan di kambio di klima, miéntras ku nan ta risibí ménos protekshon ku hendenan na Hulanda Europeo. Esaki ta inaseptabel i inhustu. No mester ta importá unda bo a nase: tur hende tin derecho riba protekshon kontra inundashon, tormenta i kalor ekstremo.”

Jackie Bernabela, demandante den e Kaso di Klima di Boneiru: “E kaso den korte akí ta duna un rayo di speransa. Nos, ocho suidadano di Boneiru, ta hiba e kaso akí huntu ku Greenpeace Hulanda pa lanta nos lidernan for di soño. Nos ta resistí e eroshon di speransa ku ta tuma lugá poko poko. Pasobra speransa ta e piedra di skina di akshon. I awor nos tin mester di akshon. Rikesa lo no salba bo ora e awa kuminsá subi. Poder lo no salba bo ora malesa kuminsá plama. Solamente kompashon, kurashi i union.”

Estado Hulandes ta priorisá kontaminadónan grandi mas tantu ku klima i hende

Polítika a debilitá e maneho di klima den añanan resien, i e gabinete (demishonario) no ta alkansá e meta di klima stipulá den e Lei di Klima. Enbes di esei, e gabinete ta duna ​​supsidio pa kombustibel fosil i ta eliminá e impuesto riba CO2 pa kompanianan. Durante formashon di e gobièrnu nobo tampoko no a tuma desishonnan ainda ku ta nesesario pa redusí emishon. “E gabinete tin man tené riba kabes di kontaminadónan grandi, a kosto di klima, hende, i futuro di nos planeta. Nos no mester solamente tene e metanan di klima na bista, nos mester logra nan i aselerá nan. E tempu di retraso i posponementu awor si mester ta tras di lomba di bèrdat. Solamente ku medidanan fuerte i hustu lo por redusí emishonnan mas lihé,” asina Vellekoop a bisa. E habitantenan di Boneiru i Greenpeace ta eksigí pa Hulanda por lo ménos atené su mes na e Lei di Klima di Hulanda i duna su kontribushon hustu pa tene e kalentamentu di mundu bou di 1.5 grado Celsius. Esaki kemen redusí emishon di CO2 te na sero mas lihé posibel. Esei ta posibel na Hulanda pa aña 2040.

Kaso di Klima di Boneiru

Investigashonnan anterior hasí na enkargo di Greenpeace Hulanda ta mustra ku ya kaba e krísis di klima ta afektando bida diario na Boneiru. Hendenan ta eksperensiando e efektonan di kalor ekstremo riba nan salú. Subida di nivel di laman, wer ekstremo, i refnan di koral ku ta muriendo ta forma riesgonan grandi pa habitantenan. Si no tuma medida, te ku un kinto parti di e isla por bai bou di awa pa fin di e siglo akí. P’e motibu ei ocho habitante di Boneiru huntu ku Greenpeace a bai korte pa eksigí un maneho di klima hustu di Estado Hulandes. Nan ta ser asistí pa abogadonan di Kennedy van der Laan i Prakken d’Oliveira. E seshonnan den korte a tuma lugá dia 7 i 8 di òktober 2025, kaminda e ocho demandantenan tabata presente.

Pa mas informashon:

Laura Polderman – ofisial di prensa di Greenpeace 

+31 (0)6 2900 1140 – [email protected]

Greenpeace su number general pa prensa: +31 (0)6 2129 6895

Por sigui e veredikto via un livestream di korte. Na e veredikto Onnie Emerenciana i Jackie Bernabela, demandantenan den e Kaso di Klima di Boneiru, lo tei presente, huntu ku Marieke Vellekoop, direktor di Greenpeace Hulanda. E veredikto lo keda publiká pa 3:00 pm (10 am GMT-4) riba Rechtspraak.nl. 

Tin tambe un hues di prensa presente. Bo ke ta presente den korte? Registrá aki. 

Download aki e imágennan di e Kaso di Klima di Boneiru. Bo ke keda na altura i risibí updates tokante e Kaso di Klima di Boneiru? Awèl forma parti di e grupo di Whatsapp akí pa periodista.