Den Haag, 14 di desèmber 2022 – Representantenan di Greenpeace a papia awe ku sekretario di estado Van Huffelen enkargá ku Relashonnan di Reino. E rapòrt di investigashon di Vrije Universiteit tokante kambio di klima i Boneiru, ku resientemente a keda publiká bou di enkargo di Greenpeace Hulanda, tabata motibu pa e kòmbersashon.
Na e ministerio di Asuntunan Interno na Den Haag, Greenpeace a enfatisá ku gobièrnu Hulandes mester karga su responsabilidat i mester protehá Boneiru – i Saba i Sint Eustatius – kontra e konsekuensianan serio di kambio di klima.
Huntu ku habitantenan
“Pa kontraarestá kambio di klima, e emishonnan mester baha rápidamente rònt mundu, pues na Hulanda tambe, i pa protehá Boneiru i e otro islanan kontra e konsekuensianan di e kalentamentu mundial, e gobièrnu mester drenta akshon rápidamente den kolaborashon ku e habitantenan”, asina Faiza Oulahsen, kabesante di Klima i Energia na Greenpeace ta bisa. “E sekretario di estado a skucha nos preokupashonnan, pero awor mester yega na medidanan konkreto. Pa eksigí ku esakinan lo ser tumá, nos ta preparando huntu ku hendenan na Boneiru un kaso den korte kontra e estado Hulandes.”
Tokante e Klimaattafel ku lo ser lantá pa Boneiru, Greenpeace a bisa e sekretario di estado ku ta esensial pa e habitantenan di e isla ta enbolbí den esaki.
A pidi dokumentonan di gobièrnu
Banda di esei, e siman akí Greenpeace a risibí e promé dokumentonan despues di un petishon di WOO ku Greenpeace a entregá na e Ministerio di Asuntunan Interno i Relashonnan di Reino. E Wet Open Overheid (WOO) [Lei di Transparensia] ta duna e posibilidat di pidi pa haña informashon di gobièrnu. Greenpeace a pidi e ministerio for di den yüli 2022 pa divulgá tur dokumento den kual ta papia tokante kambio di klima, adaptashon di klima (medidanan pa limitá e konsekuensianan di kambio di klima) i siguridat di awa riba e islanan BES. Greenpeace awor a risibí e promé dokumentonan, i e sobrá dokumentonan ta ser sperá pronto. E ministerio lo publiká e dokumentonan akinan. Greenpeace ta bai studia tur dokumento detayadamente.
Via e website di Greenpeace ta hasi un yamada riba siudadanonan pa manda un karta tokante e krisis di
klima na minister presidente Rutte bou di e lema: “Boneiru, Sint Eustatius i Saba ta importá!”
