(©ග්රීන්පීස් දකුණු ආසියාව, 2026 මාර්තු)
කොළඹ, 2026 අගෝස්තු 25 – ධීවර අමාත්ය රාමලිංගම් චන්ද්රසේකර මහතා සමඟ අගෝස්තු 17 වන දින පැවති හමුවකින් අනතුරුව, වෙරළබඩ සංවර්ධන, සංරක්ෂණ සහ ඉඩම් භාවිතය පිළිබඳ තීරණ ගැනීමට පළමුව, ආදිවාසී ජනතාවගේ සහ ප්රාදේශීය ප්රජාවන්ගේ නිදහස්, පූර්ව සහ දැනුවත් එකඟතාව (FPIC) තහවුරු කිරීම සඳහා ශක්තිමත් යාන්ත්රණයක් සකස් කරන ලෙස ඉල්ලමින් Greenpeace South Asia සංවිධානය විසින් පෞද්ගලිකව ම අමාත්යවරයාට, අදාළ රාජ්ය ආයතන වෙත සහ ප්රධාන පාර්ලිමේන්තු නියෝජිතයන් වෙත නිල ලිපියක් භාර දෙන ලදී.
ශ්රී ලංකා රජය දැනටමත් ජාතික වනෝද්යාන සහ සංරක්ෂිත ප්රදේශ තුළ ජීවත් වන ආදිවාසී ප්රජාවන්ගේ සාම්ප්රදායික අයිතිවාසිකම් ආරක්ෂා කිරීම සඳහා නව නීති රීති සලකා බලමින් සිටියි. එවැනි පසුබිමක, පරිසර පද්ධතීන්, ධීවර කර්මාන්තය සහ ස්වභාවික සම්පත් සමඟ දිගුකාලීන සබඳතාවක් සහ යැපීමක් සහිත ප්රජාවන් ජීවත් වන වෙරළබඩ සහ සාගර ප්රදේශ දක්වා ද එවැනි වැඩපිළිවෙලක් ක්රියාත්මක කළ යුතු බව Greenpeace South Asia සංවිධානය පවසයි. විශේෂයෙන් ම වෙරළබඩ ප්රදේශවල ප්රාදේශීය ප්රජාවන්ගේ අයිතිවාසිකම් ආරක්ෂා කිරීම සඳහා වැදගත් වන සාම්ප්රදායික දැනුම් පද්ධතීන්, ඉඩම් හිමිකම් සහ ප්රවේශ වීමේ අයිතිය මෙන් ම ස්වභාවික සම්පත් ඔවුන් විසින් ම තිරසර ලෙස කළමනාකරණය කිරීම වැනි අංග සඳහා පිළිගැනීමක් ලබාදීම තවමත් අභියෝගයක්ව පවතී.
“තීරණ ගෙන අවසන් වූ පසු ප්රජාවන් සාකච්ඡා සඳහා කැඳවීමේ තේරුමක් නැහැ. ශ්රී ලංකාව තම සාගර සම්පත් සංරක්ෂණය කිරීම සම්බන්ධයෙන් අවංක නම්, පරම්පරා ගණනාවක් තිස්සේ වෙරළබඩ පරිසර පද්ධති ආරක්ෂා කරමින්, ඒවා මත යැපුණු ජනතාවට ඔවුන්ගේ අනාගතය සම්බන්ධයෙන් තම මතය ප්රකාශ කිරීමට අර්ථාන්විත අවස්ථාවක් ලබා දිය යුතුයි,” Greenpeace South Asia සංවිධානයේ ප්රචාරක නිලධාරී අනීටා පෙරේරා මහත්මිය පැවසුවාය.
බොහෝ අවස්ථාවන්හිදී, රාජ්ය අනුග්රහය ලත් කාර්මික සංවර්ධන සහ නිස්සාරණ කර්මාන්ත විසින් ප්රජාවන් ඉවතට තල්ලු කර දැමීමත්, නොසලකාහැරීමත්, සක්රීයව හානි සිදුකිරීමත් සිදු වේ. ආයතනික ලාභයට සහ නිස්සාරණයට පමණක් ප්රමුඛතාව දීමෙන් සහ, ප්රාදේශීය ආර්ථිකයන්ගේ යහපැවැත්ම සඳහා අතිශය වැදගත් වන ප්රජා මූලික සංරක්ෂණයට හෝ සහභාගීත්ව ප්රවේශයන්ට අවශ්ය සහයෝගය ලබා නො දීමෙන්, ශ්රී ලංකාව සිය ජාත්යන්තර ප්රතිඥා ඉටු කිරීමට අසමත් වෙමින් පවතී.
එනිසා, ප්රාදේශීය ප්රජාවන්ගේ ඉඩම්, ජල මූලාශ්ර සහ ජීවනෝපායන් කෙරෙහි බලපාන වැදගත් තීරණ ගැනීමට පෙර, ඔවුන්ගේ නිදහස්, පූර්ව සහ දැනුවත් එකඟතාව ලබාගැනීමේ යාන්ත්රණයක් ස්ථාපිත කරන ලෙස Greenpeace South Asia සංවිධානය රජයෙන් ඉල්ලා සිටියි. සාම්ප්රදායික පරිසරික දැනුම් පද්ධතීන්, සාම්ප්රදායික ප්රවේශ වීමේ සහ ඉඩම් හිමිකම් මෙන්ම ප්රජා මූලික පාලනය පිළිගැනීම මඟින් සංරක්ෂණය මෙන්ම වෙරළබඩ ප්රජාවන්ගේ ජීවනෝපායන් ද ශක්තිමත් කළ හැකි බව එම සංවිධානය පවසයි.
මාධ්ය සම්බන්ධතා:
Shanuka Kadupitiyage
Greenpeace South Asia, Media Officer
[email protected] || +94 72 644 4770
Anita Perera
Greenpeace South Asia, Campaigner
[email protected] || +94 773925597
වැඩිදුර පරිශීලනය සඳහා:
- ගෝලීය සාගර සාධාරණත්වය දැන්ම: සාගර සංරක්ෂණය සඳහා මානව හිමිකම් මත පදනම් වූ ප්රවේශයක අවශ්යතාව තහවුරු කිරීම
– වාර්තාවේ සහ විධායක සංක්ෂිප්තයේ ඉංග්රීසි පිටපත්
– විධායක සංක්ෂිප්තයේ සහ ශ්රී ලාංකේය තත්ත්ව අධ්යයනයේ සිංහල පිටපත
– විධායක සංක්ෂිප්තයේ සහ ශ්රී ලාංකේය තත්ත්ව අධ්යයනයේ දෙමළ පිටපත - වෙරළබඩ ප්රදේශ සංරක්ෂණය සහ කළමනාකරණයේදී ආදිවාසී ජනතාවගේ සහ ප්රදේශවාසී ප්රජාවන්ගේ නිදහස්, පූර්ව සහ දැනුවත් සම්මති (FPIC) යාන්ත්රණ සලකා බලන ලෙස ශ්රී ලංකා රජය වෙත යොමු කරන ලිපිය
